كلمات اغنية اكتساح الجفراني - جابر بن هضبان 2026

 اكتساح

خيل خيال مقاديمه بروق ورعد

رعاده يزمجر وبرقه على الروس لاح

قام يتصلخ على روس النوازي برد

واثقل مواطيه شاملة صياهد رماح

لا احد يغايب لياجينا نهار الوعد

بيجي عليكم صباح وي والله صباح.

عاداتنا لابطشنا مانفكر في احد

اليا حضرنا اكتسحنا الكايدات اكتساح

حظوظنا ماتخيب وعزنا معتمد

اليا كربنا محازمنا عراض الشباح

فعولنا اللي تمضينا قدام وجدد

وسلومنا مصدر التمجيد والامتداح

من يوم ربي خلقنا من سعد لا سعد

اسم قحطان يتجلا مثل نور الصباح

رجالنا لا وقف في ماقفه ما ارتعد

ماهو بيجبن ولو يجبن رصاص السلاح

وان جا التنافس على شلفا ولي العهد

عيو عليها بني عمي طيور الفلاح

قولو لهم لا حدٍ يتعب ولا يجتهد

لياحضرنا مال احدٍ في الصداره صلاح

برك لها شايب يوم الملاقى ولد

روابعه ماتبور وسدته ماتباح

قام السحيباني يسوق الروابع جلد

من دون ناموس ربعه كل شي مباح

افنى الملايين واسرف في الجيوب الجدد

مافيه يوم ماضوى فيه وضحا شناح

ياحي راس ليا جا موقفه مابرد

يزود ويجود ويورد عدود القراح

يابوعلي مايسود الا الاسد وانت اسد

لطيب فعلك تبنا كل بيضاً ضياح

فيك الهقاوي كبيره وانت محزم سعد

اقدم وزيد النجاحات القديمه نجاح

خل العليميه يشوفون ضرب الركد

الشوط حامي ومحتلات سم ذحاح

نوادر مايضويها ضعيف جهد

عزل المجاويخ يوم الفصل روس الرماح

الوحده تقول يسمر في نحر وتد

معا تنهاضة الغارب سناد وطفاح

تقول عنقا من الخفرات غضت نهد

تلعب على الغيره اللي في عيون الملاح

مياسة زينها باذخ وابوها سند

لاطري اسمه يجيها غطرسه وارتياح

في نحور بيكور شيخ يرتكي في الوعد

يحسب حسابه ويدرابه ليا جا وراح

يقول ميعادنا شلفا ولي العهد

في المهرجان الكبير اللي في صيهد رماح