كلمات اغنية الرياح المرسلة الجفراني - جابر بن هضبان 2025

الرياح المرسلة

سوّ لي فنجال دلّه وعجّل يا فلاح

الله الله والقصيدة تجيك مزرفله

أترك اللي كن قلبه على خف وجناح

وأنحر اللي يدحم طويق ويقول أزهله

لا تصدّق بارق الصيف يوم البرق لاح

أغلب الشعار شعرٍ بليا مرجله

كم لي أحط القصيدة على خشم السلاح

يوم شفت المشكلة فوق راس المشكلة

عرّضوني يابني عمي السم الذحاح

ونطّحوني مارد الموت وأشرب منهله

دونكم حي المنيه وحيا للفلاح

الله أكبر واليدين القصار مكبّله

ذاخرٍ لي مجد قومٍ توشّح بالوشاح

عزهم بالمجد رب الفلق والزلزله

لابةٍ دون المرابيع والصفرا الشناح

فوق سرد الخيل مثل الرياح المرسله

سلمهم حذف الجماجم على روس الرماح

وأزهم الرجال بالأسم لين تجندله

خيّل الصفرا أحمر العين قوة وإبتجاح

لحدٍ يجهل علينا ويقتله إجهله

دون حق مطير مافيه عذر ولا سماح

أستريحوا مانبا صوت ولا بلبله

ماحضرنا غير بالنادر الهزعا الطفاح

من معامق بوشنا اللي تعرفون إجمله

تحت حكم مطير ربعي متيّهت الطياح

الرفيق ندلّهه والخصيم نجفله

يا زعل عرّض هل الصفر فالحزم البراح

ونوّخ اللي ودّه يطيش من كثر إزعله

حطهم فالصالة اللي ورا صيهد رماح

وحط دون الباب قفل وكلبش وسلسله

مانبا نعفي منافس ولا نطلق سراح

الدروب مقفّله والكشوف مسجله

جابهم ربي على الوقت والدنيا كفاح

بشّر الصيهد بـ يومٍ مثل يوم جبله

صفرنا ماتارد الا على العد القراح

زفها للفوز وأشعل بها الشوط أشعله

خلها تاطى على الأرض وتدك الفياح

أنت حرٍ جمّل مطير والله جمله

نخبةٍ تجرح هل الصفر وتزيد الجراح

كل ماحان التنافس وجات محوّله

كلبوها نسق واحد على صح وصحاح

أتهزّع من رهاوه وتمشي بـ إعجله

يا أهل الخمسين والليل يقفاه الصباح

فوز ما من فوز كلٍ يعوّد لأهله

قدمكم نارٍ تلضّى وراسٍ ما أستراح

من زمان العام ينذر وجهده يبذله

هوّنوا فالشوط كلّه وصلوا فالمراح

ما يجيب الأوله غير راع الأوله