كلمات اغنية تنبهوا الجفراني - جابر بن هضبان 2025

تنبهوا

البارحة وضع القريحة مثل عساس الديار

راع الجهام الي يدور له مكان يرغبه

والمزن يلمع بارقه والارض كاسيها الخضار

تزينت عقب العجاج الي غداله عنكبة

بين الطواري والوعد بحث وتحري وانتظار

حي اللزوم الي تكحل به عيون الموهبة

الله يعين الي يقدم للمهمات الكبار

وان طاب يطلع مرتبة وان غاب ينزل مرتبة

ترى الولد لا حط له في قمة العليا مسار

يحط شرهات الرفاقه بين دقنه و شنبه

ياساعة الماجوب مافيها يمين ولا يسار

الشعر يعرفنا مثل عرف الخوي ل معزبه

ماباقي الا الموعد اللي حددوه اهل القرار

في موقعٍ كلن يشد له الحزام ويكربه

جو الصياهد هالسنة ركز خياله واستدار

تطغى عليه الحالة الجوية المتقلبة

احد ٍ يجي سيله وقع واحدٍ يجي سيله عيار

واحدٍ يقدم من رهى واحدٍ يجمع مزهبه

استبشر الجمهور باسمن له مكانة واعتبار

بشارتن منها اكثر الملاك راحوا بنشبة

ياهل الشعل مافيه لاصدة ولافيه اعتذار

الذيب يقنب في شماريخ الطوال المرقبة

يالي تخيلون المخيلة هل ماطرها شرار

وكبودكم مبطٍ ضماها والعدود مقظبة

فيصل ولد نايف يناديكم جهارن من نهار

هوايته ينشد عن الراس العنيد ويطلبه

تنبهوا واخذوا حذركم ياطويلين العمار

لاتدخلون يدينكم في جمر ناره ولهبه

جاكم يبا يكفى هقاويكم مثل كفي الغضار

وعزومكم يقطع نفسها مثل قطع الذبذبة

له كم شهر يصرف وديعة بنك ويصرف عقار

ويتل جيبه من علاوي نجد لين الدبدبه

يبا الغزير اللي تخبط الارض ويثور الغبار

اكلف ماعنده لا لقاها شيكه اللي يكتبه

ان حطوا الوسم المزيف تحت الاسم المستعار

جاب البكار الي وسيمتها تعود لنسبه

نوادرٍ يالي توصفها عليك الاختيار

ان قلت عشرين فشقة وان قلت عشرين ذهبة

صميدعِ سيفه حديد ونظرته مشهاب نار

لازعزع الميدان خلا سيف الاخصام خشبة

يبا يحط الجايزة للفيصليات احتكار

الضرب شوف العين والهقوة ماهي مستغربة

معه رسالة للجميع مختمة باكبر شعار

رسالتن ماكتبت الا عن دليل وتجربة

موجهة للي على الصيهد يسوقون البكار

كنه يقول الي يداحم حرب يفحص منكبة

قبيلتن لاطال ركض الخيل والبارود ثار

كم طايش من فعلهم دقت على الارض ركبه

يوم الجزيرة جوها تردح به الدهم القصار

وشعوبها متفرقة ودروبها متشعبة

يشهد لهم من شيد القلعة ومن جاب القطار

قبل الامام يمسي المصمك ويستل اجربه