كلمات اغنية شهرت حبك الجفراني - جابر بن هضبان 2026

ياطول .. ليل الشتاء طولاه يامسلمين

من يوم جاني معه ضيفٍ ماهوب انكري

يسيطر الصمت .. ويضم .. الكرى كل عين

وعيون يعقوب لولا الصبر وش تحتري

انا اللي اقول ذبح الذيب ماهوب زين

كيف اتهموني بـ دم الذيب وانا بري

لازال .. علمه ورى الاضلاع سرٍ دفين

احيان .. ماينجحد .. واحيان .. ماينطري

اليوم .. قدني .. على مشارف الاربعين

استامني .. يالبكار الوضح واستبشري

لابد .. اجيهم .. عقب غيبه بـ علمٍ يقين

حتى .. لو ان .. الظروف تحيّر العبقري

يجيك من صلب بياع التتن شيخ دين

ويجيك من صلب تباع البكار حضري

يارب هب لي ثقل حجه وجنبٍ متين

لاميّل .. الحظ .. مثل .. بريهة العسكري

ولا انت يامشغلٍ فكري عن العالمين

لازلت في .. سيرتك متطرف وعنصري

انت اخر اللي لقيت من العرب الاولين

من طرفك المستريب لزينك الجوهري

اللي يصلي معك فـ أول لقا ركعتين

مالقا قوت يومه عده اكبر ثري

العام هذا كمال نصاب ( عشر السنين )

ياللي مشاهدك .. يغني عن حليب المري

ياكثر ماغيب .. عند مهجرعات الحنين

وانا .. على .. جيتك يابري حالي بري

انا ماحب .. التناقض .. كون في حاجتين

اهيم .. واسري لها .. في ليل ماينسري

ترحيبك بـ الابتسامه وانت خاطرك شين

وتصنعك لـ القساوه وانت عودك طري

سبحان .. من ميزك بين العباد اجمعين

كنهم غسول قهوه وانت قهوة شمري

شهرت حبك وانا واحد من المعجبين

مسلمك جوختي ي لابس الغندري

تزعلني .. بكلمه …. وترضيني .. بـ كلمتين

ذللت .. لك قلبي اللي فـ المواجه جري

صخرت لك في مجال مدلهات الحزين

مالا .. يصخّره .. ابو تمام .. والبحتري

ياكبر فضلك .. على .. طلابي الناجحين

وانا ماخذت البلاغه من كتب الازهري