كلمات اغنية حبك اشقاني الوليد ال عامر 2025

ألا يا الجميل بكل شي.. حبّك اشقاني..

وحتى شقا حبّك جميلٍ بتعذيبه..

انا الصاحب الوافي ابو المحزم القاني..

َخويّ الغرام وصاحب العز والهيبه..

بذاك المكان ان كان حبّيت تلقاني..

ترى كل شي باقي على نفس ترتيبه..

بعنق الغرام الحرّ.. علّقت ميزاني..

و صدر الأمل متعلّقٍ في تلابيبه..

لو اعصار "إيدا" هبّ ماحرّك اغصاني..

ونسمة هواك ان وصلت الجذع تهوي به..

يمرّ الوقت والحب محشوم ومصاني..

والافكار تسرح به والاشواق تسري به..

مع القرصنة والقنص مازال قرصاني..

شغوفن يقرصن حب يا مقرصن الطيبه..

تراني أنا اللي ما ترى فيه نقصاني..

ألبّي الفضول وكل مالقلب ينوي به..

تكاملت والله كاملٍ ما معه ثاني..

مرادي كمال اللي مكمّل مواجيبه..

ألا يا الهنوف الدارجة خلف ضلعاني..

تمنّي وش اللي في مرادك و هَلّي به..

لو الحظ يسعدني بلمحة على شاني..

أخذت البحر في راحة الكف والفي به..

بديتك بياقوتي ولولي ومرجاني..

و بانسام بحر الحب واسرار تطبيبه..

وازيدك بدهن العنبر احساس متفاني..

وعاده صمغ باقي بلونه وتركيبه..

ولو قلت حوت العنبر اتيت به عاني..

لتستخرجي صمغه وتستخلصي طيبه..

دلالك بديعن في محاكاة الانساني..

مدى سحر أُنسه ينعكس في أساليبه..

لو الذوق يستعذب صدى صوت وجداني..

مليت الفضا ما بين مبدا وترحيبه..

لو الحب من خلف المضاليل ينصاني..

فعلت الذي أوائل القوم تدري به..

لنبضة يشوش الراس وتْضيق قمصاني..

واصبّح ديار الحقد واقصف مضاريبه..

وادكّ البقاع بعظمة الكعب وحصاني..

وادقّ النحور اللي ورا قلعة الريبه..

ولكن مهي بالجور يا سيد خِلاّني..

مجرّب حفظت الوقت من كثر تجريبه..

فقد ينصرف عنّي من احسبه خَلاّني..

وصوبي فعلم الغيب الاقدار تجري به..

وقد يحتويني حب و يجَنّ بجناني..

والاحق سرابٍ غابر الوقت مقفي به..

لذلك أمرني الحق والصادق اوصاني..

بما في كتابي واعتصم به و اصلّي به..

لقيت الرضا في الصبر حتى لو اقصاني..

جبرني التغلّي والغلا ويش اسوّي به..

قد اسمه غلا من حقّه ان صار يعصاني..

و من حقّه اتلوّع بحبّه و اغنّى به