كلمات اغنية الرفيق السنافي خالد ال بريك 2025

الرفيق السنافي

هاجسً يجبر الشاعر يصير معزول

بين نظم القصيد وبين رسم الخيال

ياظروف الزمان وياثقال الحمول

ماارتخى المتن من شيل الحمول الثقال

لو يميل الزمن ماجا بعزمي ميول

عقّب الي ليا ضاق الزمن فيه مال

بين سود الليال وبين قرع الطبول

امتعود على الضيقه وسهر الليال

يسهر الي يدور للصعايب حلول

ويبدع الهجس فالطيب كريم السبال

للرفيق السنافي حق حتى نزول

مفردات البيوت بطيب فعله تقال

مانسينا فعولك ياجزيل الفعول

انت عبدالعزيز الي فعولك جزال

والله انك يابو متعب تقول وتطول

اشهد انك لفعل الطيب مضرب مثال

ربي اللي وهبك المعرفه والقبول

واليدين الكريمه مع زحول الرجال

سيرتك كل ليلة بالمجالس تجول

في مقرّ الرجال مبّهرين الدلال

من عرفتك على فعل الجمايل عجول

تزرع الطيب بدروب الوفا والكمال

ومن يخاويك راسه مثل راسك يطول

ومن يبي يفعل فعولك ماعيّن مجال

ومن يجاريك يتعب لين عاد مخذول

ومن تحداك يبغاله سنين طوال

الكرم فيك فطره ، ياسليل الزحول

يالكريم المعرّب ، من عمام وخوال

الصعب بينك وبين الفخر مايحول

جامعً في رصيدك طيب راسً ومال

صاب الاخصام من جدك وفعله ذهول

في جريّان تفخر يابعيد المنال

التواريخ ياسبيع الدهايا تقول

انتم اهل العشر مافيه شك وجدال

وانت عبدالعزيز الي فعولك تهول

والله انك بعيني يارفيقي لحال

ومن يشكك بطيبك قال عنك مهبول

كان طيبك هبال الله يديمه هبال

ومن تربا على العليا استعاب النزول

منزلك يارفيقي في علو الجبال