كلمات اغنية العيون السود خالد ال بريك 2024

خاطري ياعصر دايم تستثيره

منك حتى ازرار صدري كيف ازرّه

الشفق الاحمر ورا المزن الغزيره

خد غرو امغطياً وجنته غِرّه

والعيون السود داخلها بحيررره

وتحت نحره حرّه ووادي وحره

بنت عودن عايش اسنينه الاخيره 

شايفن فالوقت شيً مايسره 

والله ان العمر والدنيا قصيره

وانا راضي بالقدر خيره وشره

شاعرن سليت سيفي من جفيره

جايبن لي من بنات الفكر درّه

والقصيده بنت امير وبنت اميره

تطمح لشيخ الفعل لله درّه

حضرة احسين السعد مافيه غيره 

مابه احدن يجهله ولا يغره

 شيخ قومً من مشايخة العشيره

جده وديّان يوم الحرب كرّه

يتعب اهل الجيش في يوم المغيره

لين خلا اخشوم الاخصام اتدرّه

والحفيد احسين بمجادن شهيره

لاتولّا المال مايعرف يصرّه

ركننا في كل ميرادن وديره

في شمال المملكه هذا مقره

يابن وديّان ياجزل المسيره

والنعم بك تسعه وتسعين مره

انت كنك اكليب في شبه الجزيره 

بس لن يقتلك ( جساس ابن مره )

حاسدك مثل المره صايبه غيره

وان تمادى قام في ثوبه يطره

انت زحلا للفخر يشعب ابعيره

احتزم بي والحسود ايموت حرّه

والله من طيب النوايا والسريره

يبن عمً شوفته عيد ومسره

سعد عين ومحزمً كله ذخيره

ابلجً من ظهر حر وبطن حره

يدمح الزلات من صافي ضميره

ولايجي في خاطره مثقال ذرّه

العرب تصدر وتارد من غديره

الطراقي ماتمر الا وتمرّه 

المواتر حول بيبانه كثيرره  

غادين منها على الازفلت جرّه !!

يختدم للضيف لا اقبل في مسيره

كنه ابوه اللي على الطاعه يبرّه

سيفنا اللي مايعود في جفيره .. 

الا لين ايخلّص الموضوع مره 

كانها بالخير كل الخير خيره

وكانها بالشر يكفي الله شره

ذخر ربعي والتواريخ الشهيره

من وداعين السعد والروس حُره 

بالثمان اللي لها فالمجد سيره

لاد ودعان الجبال المشمخرّه

مثل مايروي الحديث ابو هريره 

العرب تروي الثمان المستمرّه

لـ اعتزينا بالوداعين الشهيره

كم عقيدن من ظهر خيله نجرّه

نبعج الخطه على الحرب الخطيره

يوم كلّ ايشد محزمه ويزرّه

لااقبل الحراب والشيخ وشويره

ننطحه والملح في عينه نثره

لانطحنا الجمع روّح بعثريره .. 

وخصمنا مانهجده في حين غِرّه

من هل الوادي مقابيس الذخيره

يوم سمّي بسمنا على مقرّه ..

الدواسر عزوة المجد الكبيره 

ربعي اللي كنهم انجوم المجرّه

خير من سلّ المراهيف الشطيره

وهيبة فالارض من بحره لـ برّه

اهل زبنن واهل خوه واهل جيره 

قرّ عين اللي فقد للعين قرّه

 والوغا والحرب لامن دق زيره

من يحاربنا يبشّر بالمضره