كلمات اغنية القلب الغيور خالد ال بريك 2025

على فوانيع الكلام الي ليا ناش الصدور

تركض مع حروفه سيوف وصهل خيلٍ مدبكه

تفيض مع هدر الحلوق وتنتعش منها القفور

وتحيا وراه أرضٍ غدت للذيب الاسحم مهلكه

أول مظاهيره تطير العين مع سرب الطيور

واخر هديره لو يقبقب فوق ضلع يبرّكه

من عاش عيشة ذيب شاف الحزن يشبه للسرور

حتى أبتسامات الحنين تصير عنده معركه

أخلوا سبيلي من كلام الشوق والقلب الغيور

الحين ما ابغى الا حمادٍ ما يجي فيه شبكه

من فوق جيبٍ خوّته لا دقرّت بعض الامور..

اطيب وجود من الوجيه الي غدت مستهكله

لا صد ابو راسٍ يدنق فالصحون وفالقدور

الي لا وصله علم من روس الرياجيل علكه

على الجميل وبذلت المعروف ما يعرف يفور

وبيته طريقه للرجال تقول حرّة مدركه

العزله تحط الرجل فالضلع كنّه فالقصور

ويملك بها شيءٍ عجز عنه الغني لا يملكه

وان قامت الدنيا تدور ندوّر الي لو تدور

راسٍ لو يعرّض طويق بقو عزمه يفركه

عليه شرهات الظروف تساق وتعن الامور

وتحذف عليه الي خذت روس النشاما فرنكه

يعرف يضد القوم ما يعرف هوان ولا فتور

وجنبٍ بحور الارض لو هاجت ماهيب تحرّكه

هذا دخيل الله نويجي شهره وعزمٍ جسور

لو للجبال كفوف حتى اسمه ما تقدر تمسكه

أجل واكرم من مدح بالفعل مع مر العصور

واقو واسطى من فم الرشاش والي يفلكه

يفداه راعي مشلحٍ طاريه مثل الديناصور

يذكر ولا ينشاف له فعلٍ ينومس وحركه

ابو احسان اسم لو نمشيه مع سبع البحور

شفت البحر موجه يرحّب والانافه تسمكه

من ارتفاعه بالشموخ النجم بـ افعاله فخور

كن النجم بـ اذان مكه فالأذان محنكه

فالقدس قصرٍ ما على بابه ولا وجهه قصور

حيٍ عطاه ابو حسان احسان وازداد بركه

القدس كانت قبلةٍ للحق بالصوت الجهور

والحين حي القدس قبله للكرام مبرّكه

قصره مساحة مجلسه كنّه من ولاة الامور

الضيف كنّه من كرم راعيه يقدر يملكه

لو نكحل بنوره عمى الاعين ما شفت عيون عور

ولا عاد يبقى ليلٍ تسرّا الذيابه بحلكه

ترحيبه أليا قام يصدح كنّه سلاحٍ يثور

حتى قديميه من نحور المفرّد مصنكه

قدام بيته من كثر نطل الذبايح والجزور

ياخذ سنه ما نشف لا دمّه ولا سمن عككه

خيالٍ عشواٍ يمتلكها من قبل غزوة لاهور

صفراً عبس عرقوبها فوّاح هيل ومستكه

أليا قنوها الي يعبدون المظاهر والظهور

ابو نقاء حبه لها يشبه لحب المملكه

نحطب على الحطابي الامداح لا يوم النشور

وفعلٍ على وجه الملاء المشهود ماهو فبركه

الاد حطّاب الدواهي يوم للمركاض دور

أسمٍ دويّه يصخب الالباب ذل ويربكه

سيوفهم على مقاضبها ختم منع العبور

تشبه لشلفاء الي فتح بابه وحرر مصمكه

الي يقارن مجده بفعل الشلاوى فالعصور

كنّه يبى يظهر من الصخره على الناس سمكه