كلمات اغنية الى جهنّم يا رسول الشوق خالد ال بريك 2025

الى جهنّم يا رسول الشوق ول بئس المصير

م عاد لي عقلً تصيقر له وقلبً تشتويه

هالليل حالي معك حال ابن التميمي مع جرير

مابيننا غير الكلام اللي مايِمسح فالوجيه

في جنّة العشّاق مهما طوّل العمر القصير

تفّاحة آدم وإبن آدم من خطا آدم وإليه

بحاول اسلى لو ماعرف اسلى مع السالين مير

ي جعلني كان انتهى ذنبي م اعوّد وابتديه

احتاج بس انّي بليّا وجهه — احثّ المسير

وما احتاج احد يسال ( علامك ؟ ولا وينك ؟ ولا ليه ؟

بعيش مع تنهيدة الضيقه وتانيب الضمير

والخاطر اللي ( نوحة الورقا ) ماسوّت خير فيه

غياهب العزله يقوده يمها سلك الحرير

وضول الاوادم يحكم بقبض الكلبشه في يديه

صجّه ولجّه واغلب الجمْعا ماتلقى في غير

الهاربين من الفراغ الى الفراغ اللي يليه

وعبّادة المال ومدوّرة المضاهر تستدير

ثوب ( النفاق الاجتماعي ) كل ضحكه تكتسيه

والتاجر اللي يستغلّ الصبح حاجات الفقير

ويعلّمه ف الليل ( صبر المومن ) ل مايبتليه

يالله بجاهك يامجير اللي بجاهك يستجير

عن من سواك بفضلك أكْف اللي ماغيرك يرتجيه

اجعل لراسي قبل ماينقل لمثواه الاخير

عزيمةً مافيه قدره غير طاعتك تْحنيه

انا مانب مسّاح جوخً لا ل شيخ ولا ل امير

انا اللي بقعا تبطي تحدّه على اللي مايبيه

وش لون ابرضى الهون وانا من اولو المجد الكبير

لاعاش رجالً يقول القول ( ولايحتميه

انا عتيبي والعتيبي لو يصير اللي يصير

نفسه ليا ( هان الدنيئ النفس ) ماهانت عليه

اليا ذكرت اني من عتيبه ذكرت اني بخير

والله ماعاد يهمني تسع الكواكب باللي فيه

واليا ذكرت ان صاحبي راكان ماعاد استخير

آنزّح اكبر همّ ماينزاح —- والعن والديه

انا رفيق مورّد الهقوه على الجمّ الغزير

انا رفيق اللي لاطاش الخصم قالو عندكيه

ان قيل جا الامر الخطير قالو هو الامر الخطير

وان قيل ل ظروف الزمن منتي بقدّه قالت ايه

هذا عصاميّ ماخذها حبّ خشم ودهن سير

لا والله ب قلبً ماهاب الخوف وب عقلً نبيه

ياكم سهج سود الليال الخرس ف الدرب العسير

حتى السباع اقلق مهاجعها وقامت تحتريه

المجد ي راكان ي ابن عناد والصيت الشهير

يزها من الاد العطاوي مغيّيريًّ — يعتليه

ابوك قبلك يوم وقع الحرب واعلان النفير

قد ساق دمّه وانبتر ساقً على الموت يحديه

عينه تقول ارواحنا لاجل الوطن ماهي كثير

دون الوطن ( لاثارت الهيجا ) رجالً تفتديه

واليوم في صاهد رماح وهالة الجمع الغفير

عينك تقول العلم مامن علم لين إنّا نجييه

ي اهل الصفر إخذو حذركم قبل تحديد المصير

من عقب جسّ النبض لحدً يذخر اللي محتسيه

جاكم عطاويًّ ليا منّه — بطش رحتو ثرير

محدً بيقدر يردعه عن شفّه اللي يشتهيه

هذا عتيبي والعتيبي لو يصير اللي يصير

نفسه ليا ( هان الدنيئ النفس ) ماهانت عليه

اليا ذكرت انّه من عتيبه ذكرت انّا بخير

لاعاد بس يهمّكم تسع الكواكب باللي فيه