كلمات اغنية سموم القيض والخاطر المجروح خالد ال بريك 2024

سموم القيض والخاطر المجروح والضيم

دواها الغيث والرِجم و أنسام الذواري

مداهيل الحرار الشُقر و مذيّر الريم

وروسٍ للمراقيب تدفعها الطواري

ابي لي ديرةٍ شمسها غابت ورا الغيم

ماتبغى لا مكيّف ولا عازل حراري

عليها ضافي العشب كنْها روضة خريم

لو الموتر توطاه ماجاله مواري

ليا سرّت بروق الحياء ديمٍ ورى ديم

شلع ليل القصيد وسرى و البرق ساري

سقاك الغيث من نوٍ مزونه مراديم

يادارٍ عشقها فوق طوعي و اختياري

بصدري يكفخن الشياهين الصواريم

حرارٍ ماتعرف الهبوط الاضطراري

عسى الله يكتب الخير والدنيا مقاسيم

يدورن الليالي و يجرّن الجواري

اكذّب مايقوله فلاسفة المفاهيم

وأصدّق مارواه ابن ماجه والبخاري

أخذ عبره من الوقت ودروس وتعاليم

وبعض احيان خلّك مغفّل ما أنت داري

ليا شفت البشر يلحمون الشر تلحيم

تحد انيابها كنّها سباعٍ ضواري

تفك الناس دعوة نبي الله براهيم

وماقدره ربّي على الانسان جاري

ياطيب مزارق الطيب من بين الشغاميم

لو أنه في كبود العدا مثل الشباري

رفيقي والليالي مغاتير و مجاهيم

تراني محزمك والسوالف عند غاري

عشان زياد وزياد مايحتاج تقديم

تجملنّا فعوله وبالامجاد ضاري

متونه زادت النجمتين الصفر تكريم

ترك في روسيا للوطن مجدٍ حضاري

قصيدي فالكفو ماهو مجامل وترهيم

يجيك البيت ناري ومعنى البيت ناري

سلام الله سلامٍ ماهو بـ ايّات تسليم

على شيخٍ سناء ضوءه يزيح الغداري

عليه بالطلاق وعليه بالملازيم

ماجنّب عنك يابن محيّا يامشاري

يبيدن الرواسي ويبقى شدادك مقيم

ذخر برّاك من وحدّ الوسم الكباري

تنصّاك الطراقي وتنصاك المعازيم

ذرا المحتاج وبيوتك طوال المذاري

حرقت العود حتى حصل فالجو تعتيم

فداك العالم اللي يعبدون المصاري

ليا راحت ضلوع الرفيق الين من السِيم

كسورٍ ماجبرها الطبيب الاستشاري

ليا وقفّت جنبه ووصل العلم للتيم

جبرت ضلوعه وهوّن الامر الجباري

ذوِيْ محيا ليا صار للارقام تحطيم

شيوخٍ تقلع الخيل ماجتهم عواري

حناتيشٍ لا حان التحدي وابتدا القيم

تشوف اصغر ولد فالحناتيش انتحاري

طناخة روس و مختّمين الطيب تختيم

ماهو طيبٍ تحصله فالسوق التجاري

لا بالله طيب قومٍ يفكون المظاليم

طويلين الشبور و بعيدين المحاري

لا مال الحظ واصبح تقول انّه عصا الميم

يعزّه من حدا الربع ابن عمٍ مباري

وانا حظي يطول السماء ويصافح الغيم

مدام انّي عتيبي و بالعتبان اماري