كلمات اغنية علم العز جودنا خطامه خالد ال بريك 2024

علم العز جودنا خطامه

لي ثلاث ايام عيا الجفن لايهنى منامه

كن في راسي من الأشغال صفيرة طواري

الهموم تورسل اللي ممتلي راسه شهامه

والخبول تنام لو انها تحت شمس الظهاري

المهم أني مشيت وعاصب جناح العمامه

مستلم خط القصيم ومع بياض البدر ساري

من نشد عني وعن سبة غيابه عن دوامه

رحت ادور راحتي لو هي على كهف الضواري

كم حضورٍ ماوراه ألا الحسايف والندامه

خير لي عنه الغياب اللي حفظ هيبة وقاري

عزلة الانسان بعض احيان أخير من الملامه

صرت أفضلها مثل تفضيل أبو ذر الغفاري

من يدور للجمايل رد : يالله السلامه

والله إني تالي الأيام بانت لي مواري

حيلة المحتال ماتمشي بضحكه وابتسامه

ماله ألا كلمةٍ تضرب مثل ضرب السواري

ماتحركنا الوشايه والدعايه والوسامه

انت دربك درب من يكتب على الطاروق ناري

أحمد الله يوم علم العز جودنا خطامه

وأحمد الله يوم أسير في تهاتيه الصحاري

من على اللي نور ليته يفهق الليل وظلامه

ماقناه اللي رهن عمره تحت قرضٍ عقاري

ان وقف وقفت عقيدٍ تو باشر فإستلامه

وان مشى ماكأنه ألا ريس الوفد الوزاري

من جهل وصفه يناظر في تفاصيل العلامه

شيخ قومٍ طاح عزمه وانحنى ظهره جباري

ماسهجته غير في درب المراجل والقرامه

ولا طرالي غير مشعل قبل لأصدر قراري

صاحبٍ شوفه يذكرني بهمال الغمامه

ينعش القلب الكسير اللي عليه الحزن ذاري

معه أحصل راحة البال المعومس وانسجامه

كل ماصادفت ظرف تقول قبل أزهمه داري

من غلاته ودي أرافقه في يوم القيامه

فالمدينة خير جار وفالجنان الخلد جاري

ذخر شيخٍ عز الله واعتلى السبع مقامه

ذا صلاح ابن عطالله واسمه افخر به واماري

معقل الرأي الحكيم إن زاد كلٍ في كلامه

فزعة المضيوم لاحان اللزوم الاضطراري

كل يوم وكل ليلة مرتبط له في كرامه

برّك عيال البعير وخضب حدود الشباري

من كثر ماقلط شيوخ القبايل والزعامه

أرتفع سعر المباخر وأشتهر زل القفاري

كل مازادوا ضيوفه زاد فالنار احتدامه

لين راح الشبط ماله مع لهيب الجمر طاري

من سلايل عزوة جهينه مرددت الجهامه

من قبل غزوة حنين ومن قبل ذات الصواري

اسمنا وقف له التاريخ من زود الفخامه

حرر سجون الحديد وهيب سباع الغداري

يكفي ان الهاشمي خصص جهينه بإهتمامه

في كتاب الترمذي وكتاب مسلم والبخاري