كلمات اغنية ليل اغسطس خالد ال بريك 2025

ليل اغسطس ما معه سلطان من كثر الطواري

ايتجلا في مداه الفكر الوقفه كبيره

اكحل عيون القصايد فاللزوم الاضطراري

وأكحل عيون النشاما والهد النفس الحقيره

من طواري لا طواري من مساري لا مساري

ما انثنى عظم الشجاع ولا تراخا في مسيره

البليد يعيش في راحه ولا يدعيه طاري

عن صراعات الكبار اللي مواقعها خطيره

ما طمع كسر السباع ولا طمع صيد الحباري

رافعاً رايات سلمه دونها لو هي تثيره

نعرف طيور الحرار ونعرف طيور الكناري

الوحش تفرق فعوله بالمواقيف الكبيره

ودك الرجّال دون احلامه يكون انتحاري

يقدم بعقل الوليد ويضرب بسيف المغيره

اما انا دايم طموحاتي تجاور للسواري

ما التفت يم القليل ولا التفت يم الصغيره

اتركوني كل ما مني تعرضت البراري

امتشتت من زماني صابني بالوقت حيره

ما طمعت الا بكسباً دونه انياب الضواري

ما تقدم له ضعيف العزم واليمنى القصيره

انكسر وارجع واكافح ما يطيحني انكساري

واتعلم من زماني موقفي واقول خيره

اعلويً دون سده يلجم افواه الهذاري

ماعلم في وسط صدره غير علاّم السريره

ماسعيت إلا بخوة من حفظ عنده وقاري

الرفيق اللي صنع بالطيب له تاريخ سيره

تركي بن هلّال بن صحران للأمجاد / ضاري

اسم ابن صحران يصدح بالمواقيف الشهيره

الرفيق اللي على طاريه يزداد افتخاري

لا وقف بالكايده يكفيك عن ميقاف غيره

كان للاقواس باري للولد والد وباري

ذاخره عوداً يشوف انه على الوقفه سفيره

ينحر القعدان للضيفان عادات المطاري

كل ما سوا كرامه ياجد الراحه ضميره

بين ابوه وبين عمّه ماخذن منهم مواري

والفهد سيفه ليا احتاجه يسلّه من جفيره

نسل شيخاً في علوم المرجله ماله مباري

القبال الزين والفزعات واليمنى الغزيره

يا سلام الله على شيخ الكرم ذيب الغداري

راس ميزانيً براسه تقل تقدح سعيره

ان سكت هيبه وتصريحه ليا من حان ناري

وان فعل حل الأمور اللي على غيره عسيره

كل ما مالت يردد لا جوار إلا جواري

مزبن اللي من ظروف الوقت ينخى من يجيره

اسم ابن صحران بالتاريخ ماهوب استعاري

كل يوم يجدد الامجاد في شبه الجزيره

راس عودن ماقنا الا الزين من سفن الصحاري

معه هامات الوضح تاطا الحيا في كل ديره

كل ما هوبل لها قامت تخبط بالخباري

من نظره ومن رياله يوم غيره من شويره

المراجل سوق للزحول العرب بايع وشاري

والمطيري اسمهم خضرا على نفس الوتيره

عز يا مطير العريقه كان للتاريخ قاري

بالكرم والا ليا منه دعى قدح الذخيرة

من صطركم تصقطون الطايره في طلق ناري

من نوا حمر النواظر باللقى ماطار طيره

الدخيل تزبنونه يوم ما يلقى مذاري

وبالكرم تعمون عين البخل ما يلقى نظيره

يا مطيرة المنام ويا مذوقة العزاري

من تعرّض في نحاكم باللقى حستو مريره