كلمات اغنية نسيم الهبوب خالد ال بريك 2024

نسيم الهبوب اللي يحرّك هوى الالهام

تمثنى على صدرٍ غثى الهم مجتاحه

تقول إنّه موصّى على الصدر بالأنسام

نسيمه تقول يديه للهمّ مسّاحه

لاشفته وهو يلعب على شماغي البسّام

وغدت مثل طيرٍ يصفق الريح بجناحه

أبشبّه شماغي بـ طير السعد لاحام

ولا جاب معه الصيد عوّد لملواحه

أعرف السلام الداخلي غير الإستسلام

يموت الشجاع بـ حرب مانزّل سلاحه

يعرف المصير إن كان مامات للإعدام

ليا شاف جمع عداه حطّوه فالساحه

هذا السر واللي صار في مشنقة صدام

وهذا اللي خسارته كلت باقي أرباحه

ترى أهل الحسد فـ صدورها تزرع الألغام

ليا من وطيت العزّ والخير قداحه

أبو قلبٍ أسود لو يصل الصلاه وصام

ينام الحسد والبغض لانام فـ مراحه

وأبو قلبٍ أبيض لو توقّف له الأخصام

يصخّر له الله من يقوّيه بـ كفاحه

وأنا شاعرٍ ماودي بـ رحلة إستجمام

لاشفت أكثر الشعّار في رحلة سياحه

ولاأبغى بحر جده ولاشاطي الدمام

ولاأبغى مصيف الطايف ولاأبغي الباحه

تنصيّت بيت الله بـ نيّه ولبس حرام

ولبست الرضى اللي منه الأتعاب منزاحه

لاطفت وسعيت وشلت من فكري الأوهام

هذي الراحه اللي مابعدها ولا راحه

أجدّد طموحي وأرسم بـ فكري الأحلام

وعن الخاطر المقفول حصّلت مفتاحه

بعدها يبا يطري علي اللزوم الهام

وأبا أرجع وأنا شاعر ويومي بـ مسباحه

عن مطير ربعي والمدايح علي إلزام

هل السيره اللي بالتواريخ وضّاحه

وهل المعجزات اللي نحطم بها الأرقام

عزاز النفوس اللي للأكوان نطّاحه

وأنا عبدليٍ لاتعزوى ماهو بيضام

ولاهاب في مسراه وإلا بـ مسراحه

على العوني المطنوخ قرم وسليل كرام

تعزاء شطيط اللي للاخصام نزاحه

سلامي لـ راع الجود والطيّب المقدام

ومن يستحق المدح ويجمّل وشاحه

لماجد ولد عبدالله الوافي الضرغام

من السيره اللي بالمواجيب صداحه

يابشت الفخر تزهى لعبدالله وبسام

يشاف الثناء يضوي على الكون مصباحه

كرامه وجود ومرحبا واجتماع حشام

عليه المباخر فالمداهيل فواحه

حضورٍ يعيق السير عند الطريق العام

وعسى حفلكم في عزكم دامت أفراحه