كلمات اغنية العضيد الصادق ربيع اليامي 2024

عليك الرجا يا فارج الضيق يا رواف

الامل فيك فغفر زلتي والطف بحالي

عليّ وعلى غيري نعيمك ذرى ولحاف

اعوذ بجنابك من قصوري وغربالي

من يتبع هوى نفسه كتفه الهوى بكتاف

وحدّه على درب الغيا واشهب اللالي

لكن يا مشاري خلها بين نون وكاف

وتحزم وسج الرجل في دبرة الوالي

مدام المزاهب خاليه والظهور خفاف

لا تشقابها والغالي وداعة الغالي

وانا اللي لحقني من زماني جفا واجحاف

امور على بالك وامور على بالي

وتعلق بخلّان الرخا قلبي العياف

وغابوا على الشده والاقفا والاقبالي

قطيب السدود اليا دخل حرب الاستنزاف

يجرّب من الويلات والمر والحالي

يموت الغريب اللي تغرّب وشاف وعاف

ولا يبدي الشكوى على واحد سالي

عرفت وخذيت من المعرفه مع العراف

دليلٍ معي واوفيت كيلي ومكيالي

وقوفي وجوب اليا استوت ساعة الميقاف

اوقف واكفي عن بني عمي لحالي

وارحب على حسب التقاليد والاعراف

سلوم الرجال اللي من اجيال لاجيالي

هلا مرحبا ترحيبة تسمع وتنشاف

تِسرّ القلوب ابها وتشهر وتنقالي

على الهيل ف اولها وهيف القعود خلاف

وعلى العود الازرق والثنا والتبهلالي

لعينا جناب معزب الحفل للمضياف

توافد ضيوف قدرهم عندنا عالي

في حفل العضيد الصادق الوافي العراف

اخوي ورصيدي ذخري وحالي ومالي

راعي سمعة عدا بها عالي المشراف

ولا شابها العذروب لا اول ولا تالي

وراعي فزعة تشفي جروح لها نزّاف

ليا ضحضحت فزعة هل القيل والقالي

بالاخلاق والقلب الغناوي وبالانصاف

ولاهو على الزلات حضبٍ وعجّالي

عسى الله يكافيه العواثير والاصداف

وعسى الله يبكّره الولد باول الفالي

نزف البشاير في قدومه على الاطراف

وصلاحه سفرته تلحق العم والخالي

ومدام ان جده بو محمد وابو نواف

علي بالحرام ان تارد حباله الجالي