كلمات اغنية طاري البعد روان 2025

يا حر كبدي وجوفي يا بري حالي

ويامل عيني وقلبي من تواليها

ويا جر صوتي ويا حزني وغربالي

ويا ضيم روحي ويا كثرة بلاويها

مما جرى لي من الأيام عزالي

أيام عمري تشابه مع لياليها

الله يسلط على اللي مالهم والي

ناسٍ تجيب العلوم اللي توديها

شاروا عليهم بقاعٍ ربعت تالي

وجابوا علوم الحيا اللي من حواليها

قالوا لهم نبتها غادن له أشكالي

تشبع بها البل وهو ما داج راعيها

من طاري البعد في جوفي كما الصالي

لهايب في الضلوع اشتد صاليها

يذوب منه الحديد الصلب ويسالي

وش عاد قلب تقطع بين أياديها

أحبها وأدري إنها ما تهيا لي

وأدرى عليها من العالم وأداريها

من شانها لو أسوق الحال والمالي

وأحط عيني وقلبي ما توفيها

وأموت من دونها راضي ولا أبالي

دنيا بلاها عساني ما أحيا فيها

أنا ليا أوحيت غالي فارقه غالي

تضيق بعيوني الأرض ونواحيها