كلمات اغنية وجه الرحيل روان 2025

ضاقت فجوج الرحابه على البال الطويـل

وابتدا عمر التعب والظروف الموجعه

لابغيت أسـجّ مالي عن الـضــيـقـة محيل

رغـم وسع الكــون كنه ثلاثة بأربــعـه

أتـصـدد عــن طواريـك يـالـوجـه الجمـيل

ميــر ما عيــنت عقبـك سـلاه ولا سعــه

كنت احسبني عن الوقت في وجهك دخيل

كيف تقسى في خفوق المود وتوجعه

ما عرفت إن الموادع على العاشق ثقيل

من تهقوى فــيك خله بدون تودعه

ومرت الدنيا وأنـا مــن تفاصـيلـك قتــيـل

ومن غـيـابـك والهــواجيـس فـيني مرتعـه

فاقد غْضـاي السحـاوه ومنطقك الجزيل

وحسك اللي لا تحـاكيت يا دوب أسمـعه

والخصور الضـامرة لا تـــوسـدها الجــديــل

وعنقك اللّي حبــة الخال تزهى مطلعه

مع تهزع قدك اللــي من الرقه يــمـيل

يوم لا ميل عــلـى جنـب مــيـلني مـعـه

يــاغــضي الــقـد مــالــك حلـي ولا قــبـيـل

أنت خــشـفٍ للـســفـوح العـوالي مرجعـه

غب على كيفك مادام التسلــي مستـحـيل

والعنا للي يــخيــل السـراب ويتبــعـه

وطــاحت دمـوع الــتعــازي على وجه الرحيل

مـا بـقـى لـــغــيــابك الـمـر حجــة مقنـعـه