كوبليه ما هي كلمات اغنية غضنفر زياد الدساس ...؟
تاريخ طرح اغنية زياد الدساس الجديده غضنفر
٢٨ فبراير ٢٠٢٢
كلمات اغنية غضنفر زياد الدساس 2022
متخافش عليا بقيت متعوّد بُعدك مش بيموّت
عمري ما كنت بجوّد الحياة فعلاً في عيني اسوّدت
الفرح شافني قام محوّد اما الحُزن متبت
هات حُزنك في قلبي و زوّد اما ضعفت الدنيا استقوّت
فـ بجِملت .. ولا حاجه تفرّح للأخر كملت
ولا لاقي مطرح كله بيبعد امتى انا هفرح حُزني بيتعب
كل حاجه بهتت قولتلها " اتوحشتك " زعلت
حُزني ماسكني و مش بيفلت كله تاعبني الدُنيا دي ترعب
خدت الفرحه شُكك ببكي لوحدي في كل الطُرق
ازاي انساكي قوليلي ما انا جربت كل الطُرق ؟
معادش شئ في إيديا غير الموس و دموع في عينيا
انا كنت بخلِصلك قوليلي ليه خلصتي عليا !؟
حتى انتوا كلمة " دعم " حولتوها لـ " دمع "
قلبي كان بنزينه و ما شاء الله حبايبي كانوا شمع
قلبي ياما في دبش بلع شافك معاه فـ إتسرع
شافوا حُزني دلع ايه اللي نابني انا غير خوف و هلع ؟
----
من برا هالله هالله بس من جوه انا بتدمر
حبك ذنب عنه بكفر " هفرح ؟ " - بطل كدب استغفر
على الله في قلبي تعمّر إقتلني و في سلاحك عمّر
مش علاء الدين اصبحت جعفر شبل بقى غضنفر
يا دُنيا فرحيني .. او من على وشك امسحيني
يلا فرجيني .. مين خد مكاني عرفيني ؟
ليه بتمطوحيني ؟ .. قوليلي " بتحبيه " صارحيني
زعلتيني و شعري ابيّض و انا مستنيكي تصالحيني
يا وَيلي .. تملي بحزن و اتمناها ترجعلي
طب ولي ولا إنك تيجي تقولي " مش هتنفعلي "
قلبك باع ليه قلبي كل ليل في صوت صريخي اعلي
الحمد لله خسرت كل حاجه و مكسبتش غير زعلي
جابوا سيرتي سبّت جت في وشي و كانت بتثبت
يوم ارتباطنا مكانش خير طب ليه القهوه اتكبت ؟
معقول دي علامه ! .. طب ارمي على مين الملامه ؟
قولت " حاسس اني هموت " قالولي " يلا بالسلامه "
و انا مش سليم .. بعدتي عشان معيش مليم
منسيتش بـ 100 بنت و قلبي قاللي " كفايه يا ولا زعيم "
صاحبي قاللي " تحبك ليه .. انت فاكر نفسك مين ؟ "
بعد كده ارتبطت بيه " كده خالصين " يا دنيا آمين
----
من برا هالله هالله بس من جوه انا بتدمر
حبك ذنب عنه بكفر " هفرح ؟ " - بطل كدب استغفر
على الله في قلبي تعمّر إقتلني و في سلاحك عمّر
مش علاء الدين اصبحت جعفر شبل بقى غضنفر
طبّلوا و هيّصوا للكل كل ده كان تهجيص
مش قولتوا " دموعي غاليه " ليه بتنزل عـ الرخيص ؟
قالولي " بطل تدمع " .. قولت " لو اللي غاب هيرجع "
مين في حُزني بيسمع اقولهم " زعلان " يقولولي " اولع "
قولت " بحبك " ردت : ربنا يخليك .. حدّفت ظلط
و لقيتها كاتبه " الاهتمام جالي من الشخص الغلط "
زي ما سيبتني علمني ارتاح من التفكير و انام
كانت بتقتل فيا و بتهمسلي " كله هيبقى تمام "
انا عيشت في غابه فـ كان من الطبيعي اتغابى
مش عارفه قيمتي الهبله ولا عارفه انا ابقى مين في امبابه !
خليه ينفعها .. اما انا بـ تراكاتي هوجعها
العين اللي انا بعشقها لو بصت لـ غيري افقعها
يا بنت العايبه رخيصه و عامله عليا غاليه
لو كنتي انتي بنت مين فـ متساويش جزمه في رجليا
في داهيه طريقك اخضر .. سيبيلي قلبي مخدّر
اللي فات كان حُزن فـ اللي جاي هيبقى اخطر و اخطر
----
من برا هالله هالله بس من جوه انا بتدمر
حبك ذنب عنه بكفر " هفرح ؟ " - بطل كدب استغفر
على الله في قلبي تعمّر إقتلني و في سلاحك عمّر
مش علاء الدين اصبحت جعفر شبل بقى غضنفر
اغنية غضنفر زياد الدساس 2022 بالكلمات مكتوبة كاملة من كلمات زياد الدساس تم طرح اغنية زياد الدساس الجديدة على القناة الرسمية على اليوتيوب بتاريخ ٢٨ فبراير ٢٠٢٢ كوبليه كلمات اغنية
- كلمات : زياد الدساس
