كلمات اغنية وعود فارغه 2 زياد الدساس 2020

وعود فارغه 2

هههه .. مش ده كان كلامك

كان مالي و مالك , كنت في حالي و إنتي كنتي في حالك

كل غلطه بعديهالك , عيشت سنين انا بعدك هالك

بقيتي بتدعي عليا , و كنت كتير بحلف بـ حياتك

إتوحشت خناقنا و مقابلاتنا , و كل شئ كان بينا

بسألهم " سألتكوا عليا أو بتقول إن انا واحشها !؟ "

الرد كان " نسيّتك , إنتا كمان إنساها ده قدرك "

" مكتوب إنك تموت جواها و تموت تاني في قبرك "

مش كنت أعَز ليكي من أهلك طب ليه إتخليتي !؟

مش إنتي برضو كنتي قايله إنك مش عايزه حد غيري !؟

ليه مشيتي .. انا كنت بقول على كل حاجه " ماشي "

قوليلي إزاي محسيتيش بـ غيابي لما قولت " أنا ماشي "

كان شئ مُستحيل تنسيني , فين وعدك ياللي وعدتيني !؟

علمتيني أبطل أبكي , بس رجعتي و بكيتيني

و أديني .. و ديني انا مش ناسيكي و مش هميل

انا تعبت في بُعدي عنك , كان ناقصني حاجات كتير

----

تعبت في بُعدي عنك .. كان ناقصني حاجات كتير

و حاسس برضو بيكي , و عارف إنك مش بخير

علشان فاهمك و عارفك , تمّلي حبيبتي شايفك

بتحِني لكل ذكرى حِلوه جمبك عيشتها

----

عُمري ما كنت أصدق إن كل وعودك تطلع فارغه

كانوا بيسألوني عنك بضحك , و ألقى الدمعه نازله

إتفقنا نبني بيتنا .. و إختارنا أسامي عيالنا

و أول حُضن بينا زي ما تكون أنا جت في قلبي نغزه

بحِن للي أذاني , و أشكي همي في الأغاني

كإن الدنيا مش حَباني أضحك أو أبيّن سناني

كنت اسأل نفسي " يا ترى فاكراني , ولا في حُضن تاني !؟ "

ولا مسيرها ترجع ليا و تنسيني كل أوجاعي

ده إنتي حلفتي , طب كدبتي عليا لكن ربنا هيحاسبك

و لو إني تعبت إن كان عليا فـ انا من قلبي مسامحك

بالسلامه .. قلبي داعيلك ياللي سيبتي فيه علامه

مرضيتيش تسامحي حبيبك , بس هو سامحك ياما

من أول غلطه عرفت انا كنت بالنسبالك فتره

متقوليش " نسيتي " عشان انا فاهمك و انا عنك أدرى

لو كنتي نسيتي انا فاكرك , عُمري ما هنسى و عُمري ما هقدر

لو راجعه انا لسا عايزك .. ما انا زيك برضو و أكتر

----

ما انا زيك برضو و أكتر ..

أوقات بسرح و أفكر ..

انا و إنتي بعدنا ليه !؟

ملقيتش إجابه جيتلك ..

ما أنا يمكن لو حكيتلك ..

تقوليلي " كسبنا إيه !؟ "