كلمات اغنية الوصل عبدالله الصخابرة 2025

اخر الايام ماعادت الخطر وساع

عاد انا لي وقت حتى الحياه اعافها

اتحاشا نظرة العين قدر المستطاع

والطعون تهون دام الضلوع الحافها

ياحبيبي خلّ الأنسام تبحر بالشراع

و خلني فعيونك ابحر و اعدّ اوصافها

بين علمٍ ما يطرّى و رأيٍ ما يطاع

المحبة ينشرى ظلمها ب إنصافها

من تورّيه الندى الي على العود الرفاع

ماتوريه المقابيل عرض اكتافها

بينك و بين النسانيس ميله و إنهزاع

و بيني و بين المنايا لعنة أسلافها

لا تزيد جروحك جروح دام الألتياع

قالبٍ مثناة كبدي على طرّافها

والله انك رغم كثر المعاند و النزاع

قرّة عيون القصايد و مقطع قافها

لي ثلاث سنين و أكثر و انا عيوني جياع

منك يا سيّد دموعي و يا عرّافها

الغياب مريب يشبه غياهيب الضياع

لو درت عنه المدينه تلم اطرافها

ينتزع من ثومةٍ القلب صملات الشجاع

عتمته ماخفت موتي كثر ماخافها

النفوس تضيق بين الوصل والانقطاع

المفارق توّها والعذاب خلافها

يالطيف الطف من دموع لحظات الوداع

البخيت اللي يكفن وهو ماشافها