كلمات اغنية حرب الدول عواد العواد 2024

للطيب ذكر وللمواقف رياجيل

وللحمل متن وللتواريخ كتّاب

وللعز نور وللمراجل قناديل

وللجود كف وللنعم رجل طلاب

وللشعر حدٍ مثل حد المصاقيل

بيدين من له في المواقيف مضراب

وانا حضرت بسيف جزل التماثيل

في موقف يشرف بيعيدين واقراب

من بعد ما سالم بعث لي مراسيل

عن مجمل الاعذار صكيت الابواب

ابشر ياسالم ياخوي المداهيل

ماحط عذر ولا تحزم بنواب

ماني بمتعذر عن اقصى المشاكيل

وشلون لو جتني من خيار الاصحاب

واسلم يابو باسل ياذخر الحلاحيل

ياذخر عودً للمهمات غلاب

الشايب الي صيته مجاور سهيل

عويض ابن معيض حلال الانشاب

ياجعل قبره للسحاب الهماليل

وعساه فالجنه بلا سابق حساب

من روس حرب اهل البلاجيك والخيل

حرب الدول يوم التماري بالالقاب

متوارثين المجد جيلً بعد جيل

في ذمتي ماهم عن العزه اغراب

ولمحمد ابارك واغن المواويل

الي كسب من فعل يمناه ماطاب

في عرسك ابارك واسوق اتهاليل

مادامك اخذ من عريبين الانساب

وانا مطيري عز راسي بتبجيل

من لابتن تخضع لنا روس وارقاب

حضرت والموقف ماهو فيد تأجيل

والله يجملني مع ربع واصحاب