كلمات اغنية الهاجس فالح الطوق 2025

الهـاجس اللي في ضميـري تناغم

في جـوف صدري باللحن دقّ زارة

ليـن الهـواجيس الغـزيــزة تـراكم

وانظم قصـايد من فنــون و مهارة

وافكاري اللي فـ القريحـة تزاحم

تحكي مشـاعر بالفـخـر و الجسارة

محـدن عليـنا من رصيــده تكـرّم

حنـّا بنيـناها ( طمـوح و تجــارة )

و الحــاسـد اللي في قفـانا تكلّـم

مـا نلتـفـت للـي يزيـد انـحـدارة

نكتـم على كثـر البـلاوي و نكـتـم

نكشف حقـايق لو كشفنـا الستارة

تنعـاف كلمة جـوفها النـار و السم

لو كان ظـاهرها تشـوف الطـهـارة

مـن كان ودّه في مطيـحي تحلّـم

خلّه يشــنّ اليـوم مليــون غــارة

وأنـا الصـمـود اللي ثبـاتــه يعلّـم

شـامخ على روس المعـالي منــارة

وأنـا القيـادي محـد فيـني تحـكّم

اقـدح من الرأس السيـادي قـرارة

من حطـّني يمنـاه يبـشـر بمحـزم

محزم ظهـر عـزّ و شموخ و سطارة

من بـاعني بالـرخص ماني بـ مهتم

الله يبـاعــد عـن مسـاري مسـاره

لأنـّي ولـد شيــخٍ كما الحرّ الأقطم

اترك خفـافيش الكهــوف و مغارة

لو كان غيـري من ظروفه تحلطم

فيني تفـائـل لـو اشوف الخسـارة

متـوكّـلٍ بالـلـه و غيـري تحـطـّـم

والرزق من ربـّي و لا هـو شطـارة

من مالك الكـون العظيم المعظّم

تمـطـر سحــايبها بخيــر و غـزارة

عيـشـة فقيـرٍ بـ الكـرامـة منـعـّـم

أخّيـر من عيـشـة غني بالحـقـارة