كلمات اغنية راح الوسم فهاد العلي 2025

راح الوسم

يالغر مالاح لك بحدودنا عينه

وش جنبك عن طريق ٍ ماتعدنه

غبتي وغاب الحيا والكل راجينه

جانا الشتا وانقضى والنود يتلنه

لك مدة ٍ حيّنا يالغر تخطينه

والناس رزق البهايم مادروا عنه

لفيت دارً وطاها غابر سنينه

كني وانا بالشتا في حزة الكنه

لاعود ٍ اخضر ولا ضان وبعارينه

بس الهبايب اثار الدار يمحنه

ياقدرة الله ماكن الخلق واطينه

حت ام سالم نست لاتزعج الحنه

جلست امثل على دور مضى حينه

احداث بالذاكره والقلب يشعنه

وارقبت رجم ٍ كفوف يدي بانينه

نصه تهدم وشوفه حرك الونه

رجم ٍ شمال القرو بالضبط بيمينه

هجر الديار ورياح القيض هدنه

جلست عنده مثل فاقد وراعينه

مشدوه وابياتي الندر يتتالنه

يارجم لامن غزاك الوقت ياشينه

لاسل سيفه تشوف الظيم والمنه

بنيت ركنك وانا في حالة ٍ زينه

واليوم امرك وقلبي خايب ٍ ظنه