كلمات اغنية راعي الاوله فهد بن فصلا 2026

راعي الاوله 

انا اول مره الجاء للقصيد و خاطري مسرور

على غير اعتيادي ، و السبب يستوجب ايضاحه

طرى لي يومن بنوره يبدد ضلمة الديجور

قرَب صبحه يبشر عن مساه .. و زان مسراحه

مع انه يوم .. لكن بهجته للخاطر المسكور

لو توزّع على باقي العمر تكفيه بالراحه

يجي للشعر دور وللمواقف قبل هذي دور

لاقام الشاعر يقالب هجوسه مثل مسباحه

قصيداً ما معه فعل ٍ يجمل زبرقة ديكور

لكن افعل فعول الطيب والعربان مداحه

سلام الله سلاماً في مقاديمه يشع النور

من ارباب الكلام وسادته وقيادة الساحه

على سمو البقوم اهل الوفا والبيرق المنصور

سلامٍ راس ماله يكفي المسلم عن ارباحه

زحول المعركه ومدلهين الخاطر المكسور

احر من الرصاص الحي والطف من هوى الباحه

وحنا لامدحنا العزوه اللي فعلهم مشهور

يرحب فيهم .. التاريخ ويقلدهم وشاحه

على محمد ولد عبدالله انسوق الثنا المنشور

نغني له مايمكن نكتبه من وافر امداحه

هذا حرً ليا احتجته داريت ان الصقور صقور

عديمً ندهت المحتاج والمظيوم ملواحه

تقلطه العزاوي كل ما انفلت مع الحنجور

سعدنا يوم نيبان القسا والروس نضاحه

ليا جأت الصعايب عوج كنْها عكفت الباكور

عدلها خيزران وراحت من الصدر منزاحة

هذا الي كل يوم يقلط الطرقي على الميسور

كثر مافج بابه للطراقي ضاع مفتاحة

تشوف فعول راع الاوله حتى العيون العور

ياكيف المصبر الي شاف معواده ومرواحة

بحور الشعر سبعه مير انا سابح ثمان بحور

واهل عد الروا مابين جذابه ومياحه

على شان ارحمان اللي تقدم فاول الطابور

وتكسر هيبه الباشه بطربوشه وبسلاحه

يابن شباب انا في سبكة البيت القوي دكتور

واعرفك مثل حرٍ للصعيبه يفرد جناحه

نهار السيف ينسف فالجماجم والرصاص يثور

توطينا الخطر لعيون غرنوقه وطياحه

مشاهير الفعايل قبل كلً لايجي مشهور

قبل يطلع على الشهره نيوتن لجل تفاحه

يمال العز يامجد البقوم الشامخ المعمور

هذا كل الكلام الواجب اللي ياجب إضاحه