كلمات اغنية اكفيك يابندر فيصل المداريه 2025

يا الله يا مرسل علينا رسوله

يا المغني الرحمن يا عالم الغيب

يا الله أجرنا من عذابك وهوله

وادمح خطايانا وكل العذاريب

أكفيك يا بندر وفي البحر لوله

والشعر لضيفان عند المعازيب

وبندر محمد كايدت(ن) فعوله

عن كل شي، أهم شي المواجيب

من كثر ما نغليه نغلي خيوله

وأشوفه في عيني حصان الأطاليب

والله من طيب النبا والرجولة

في الوقت هذا أشهر من الزير وكليب

فعداد ما هل المطر من ثعوله

من مزنةٍ حول مطرها من الصيب

يا مرحبا ترحيب دولة بدولة

يعني عنان ترحب بشركة أريب

يا عيال عدنان الفخر يا زحوله

أشاوس في عيون كل الرعابيب

أنتم هل الميدان صولة وجولة

واللي قوي قلبه ما هو مثل أبو قليب

عبدالرحمن إن راد شيءٍ يطوله

في راس عيطا فوق روس المراقيب

شوق الفتاة المترفة والخجولة

هذا المهيدب كاسب المدح والطيب

وقت المزاد وعند ضرب السيولة

يشيب اللي ما بعد جاله الشيب

ويشيخ الدلال بعد العمولة

بعد العمولة يشتري البيت والجيب

وتلقى المطور بعد ما شاف زوله

يطلع مع أول باب يفتح على السيب

يطري علي قولٍ لشالح يقوله

يا ذيب أنا بوصيك لا تاكل الذيب

الجيد يحصل ويلقى قبوله

عند العرب من دون شكٍ ولا ريب

وأخوك عبدالله ما تبرك ذلوله

سمّوه عبدالله عطيب المضاريب

حب الأخو يبدأ بسن الطفولة

يكبر وتكبر معه كل الأساليب

حي المهيدب حيهم من حموله

وتورد الضامي عدود المشارِيب

هذي قصيدة جبتها بالسهولة

والمدح يزهاكم بجزل المكاتيب

شاعر على النصر السعودي ميوله

وحب النشاما في الضلوع المحاديب