كلمات اغنية اخوي ودرعي ماجد خضير 2026

اخوي ودرعي

قوانين ونظام المدح تكسر والقصيد يشال

وانا سلطان فن القول ومعدل قوانينه

اعرف المدح ليه يقوله الشاعر وكيف يقال

واعرف اللي يبونه ناس واجد مير مخطينه

واعرف اللي يحسب المدح مخصوصٍ لراع المال

ويدفن كل مدحه في عطاه وفي ملايينه

ظلامٍ فيه ذا يغرف وذا يازن وذا يكتال

واحد يلقى ليا اصبح واحد فارغةٍ مواعينه

وانا ما اقول ما يشكر ولا يذكر هل الاموال

ولكني ما احصر المدح واضيق ميادينه

ليا جبت الكلام اعرف وش اللي يقنع العقال

ولا اطرب للكلام اللي يجي ما هوب في حينه

وان اكفى المختصر ما اروح في تكرار واسترسال

قليلٍ حاضر يسد اللزوم ابرك من الدينه

اقوله واعرف ان الطيبين من الخوان عيال

كما سيفٍ يشيله صامل الهدات بيمينه

وانا اخوي ولدي سيفي حزامي درعي الفعال

اقص ابه اليدين الطايله ما اعلقه زينه

ليا جا في العلوم علوم اعدل به صغى العيال

على العدوان يا خشنه وللاخوان يا لينه

برك للبر يوم البر حملٍ صعب ما ينشال

على كتفه ما هو جمّالٍ يبرك بعارينه

برك له ورع ما كمل ثمان سنين ثم رجال

وحط امه وابوه وحطنا يا اخوانه بعينه

بلطف وودٍّ يشاف وصفا نفس وسماحة بال

يشيل الحمل عنا ما تقول الا موصينه

ليا انحاشوا هل الأقوال ثم جات بهل الافعال

مدورة الزلل يبطون ما هم بمتقفينه

يليق به المديح بنظم وبشيلات وبموال

وشعرٍ ينقصر عن مدح مثله تبت يدينه

هذا عبد الاله اللي لحاله والخوان لحال

ولو قلنا نبي نجزاه ما حنا مجازينه

ذخيرة شايبٍ جعله بجنات ونهر وظلال

ابوي اللي على نهج الرسول مقومٍ دينه

ويوم الجود له معنى ويرهق طيبين الفال

وابو تركي على رغم الفقر حمرٍ سكاكينه

كريم سبال لا قالوا عتيبيٍّ كريم سبال

مدورة العشا لا جوه ما هم بمتعدينه

وان امتست هو الحلحيل والنقاض والفتال

انا اقوله وعند اللي عرف ماطر براهينه

اله حزمٍ وعزم وسطوته يمكن تهد جبال

ليا شافه غضيب الراي ما تنغم شياطينه

ليا قال: "اخو رسما" صاب شجعان الرجال جفال

وكلٍ قام ينشد عن طريق العافية وينه

مسمىً باسم شيخٍ سطوته تضرب بها الامثال

وجاوز هقوة اللي باسم ابو دلما مسمينه

اخذ في الجود والسطوة من اسم الماطر الوبال

نزل في سوقها ثم قام ينقاها على عينه

عصاميٍّ يدينه في مواجيب الرجال طوال

خفيف الشعر باسمه يثقل وترجح موازينه