كلمات اغنية سيرة الأمجاد ماجد خضير 2026

سيرة الأمجاد

الحياه من البسيطه ليا الفلك وورى

ساحةً فيها النشاما على حسب الفعول

من يبيع الهون فيها وللمجد اشترى

حط له منزل ورى الجدي ينسيه النزول

العلا مطلب ومكسب محاربة الكرى

وسيرة الأمجاد لو جيت ابى اشرحها تطول

اترك اللي حزة النوب من تحت الثرى

وان قضب حبل السلامه يقول ولايطول

المراجل تنكر اللي على الهين ضرى

ولا تعرف اللي ليا دقت الساعه جفول

ترغب اللي يتلف المال قدام الورى

له عزومً لو تزول الرواسي ماتزول

حي والله من تقدم على الحق جهرى

دون ربعه ماحنى الراس بالعذر الخجول

ابو مالك لاطرى الطيب ميقافه طرى

يوسف اللي دون ربعه على الفزعه عجول

محتزم باخوانه اللي على الطيب وزرا

ذخر سلمان بن قعدان عربين الاصول

للمهمه راس شرواه مايرضى الزرى

قالطً مقلاط الأسلاف رافين الخلول

بلّم افواه المطامع وخلق الله ترى

عقب هذي .. كل عاقل يفكر وش يقول

كان في صدره وساويس تنهش بالعرا

يتحرص ، يمكن الغيض يقلبه مهبول

جرحنا اللي في ضميره بيبطي مابرى

يستره ويحط فوقه من الحكمه قفول

صفحة التاريخ ماهيب لأهل الافترا

والسوالف من هل الزور مافيها قبول

لايمي يوم اتنومس بفعله ، مادرى

عن طموحات النشاما محكّمت العقول

يوم رديان المعامق تجي خلف الذرى

ماتعودنا نساوم على أنصاف الحلول

مجدنا مجدً حقيقي مهوب مزورا

يوم للطرقه نجيبه وللفزعه خيول

المضايين الدهايا ليا رد البرى

فعلنا يرجح بالافعال ويعدل الميول

ساعةً فيها السلامه نجاه لمن شرى

ياردون لحوض الأدراك لاراحو فلول

حظنا في راس عيطًا مثل قمة كرى

ولايصيب الرجل منا فتور ولا خمول

طيبنا ورثً تسامى مع الدم و جرى

والحمايا فالخلايا مثل دق الطبول

يابو مالك راية العز لأجلك تنشرا

عد مامرت على الكوكب الاربع فصول

احتزم بي فالرخا والنهار الاقشرا

كل غايه بالتكاتف يهون الها الوصول

طاريً لي شطر بيتً بصيته يذكرا

لايقً في ماذكرته على وجه الشمول

"كلنا بالاسم والفعل والراي خشرى"

وانت زحلً جاذبك طيب جدانً زحول