كلمات اغنية شماريخ الفخر ماجد خضير 2025

شماريخ الفخر

البارحة في شواهيق المفاخر .. رقيت

آطا السما في ذلولي وأصعد مزونها

فوق الشماريخ .. فوق النايفات .. اعتليت

يا لايمين المشاعر لا تلومونها

من نشدتني وش ديارك .. وقلت الكويت

كن المجرات شالتني على متونها

يا بنت أنا حرٍ فـ وكر المعزة ربيت

من قومٍ إنْ كبْـرت البلوى يحقرونها

اللي زبن ظلهم .. له فـ المشاريف .. بيت

وفي ظلهم .. تلعب المهرة على هونها

ربعي كعام العدا حوض الندى لا ظميت

وربعي ليا نادت العليا يلبونها

سلام حصري على اللي يعشقون الكويت

ولا رحْم ابو عالمٍ ماهم يحبونها

لا اقفيت بعض الليالي عنّها .. ما قويت

نفسي لا سافرت .. كان الله في عونها

يا سعد عيني .. ليا خايلتها وانتشيت

ويا سعد قلبي وسمعي يوم يطرونها

في لابسات البراقع والذهب كم غويت

وأغويت تلع الرقاب.. وداعج عيونها

لكن على كثر ما شفت الحسن واهتويت

محبة الدار يبقى القلب مفتونها

كلي فدا ترابها .. وبكل غالي فديت

عز الله اني رخصت الروح من دونها

أعطي ويلحقني التقصير .. مهما عطيت

جمايل الدار .. ما حن نقضي ديونها