كلمات اغنية عروش المفاخر ماجد خضير 2025

عروش المفاخر

سلام يا ثقلن تميز به صناديد الزحول

وسلام يا روحن عصاميه وصدرن به سعه

وسلام يا عزمن مايحسب للعزوم وللحمول

وسلام يا وجه الكرامه والشموخ ومطلعه

الناس كلن معدنه يظهر ليا جات الفعول

والرجل لأمنه مشى له في لزوم يسنعه

والحر دايم ينطح الكايد ويرقى بالحلول

والتبع دايم ينطح الهين وهو ما يرفعه

مايدخل التاريخ من لا غامر بدرب الدخول

والخوف من خوض التجارب للجبان الامعه

اكثر بطولات الذياب الضاريه عند النزول

واكثر معذربت الشجاع اللي مافيهم منفعه

وان مالت الدنيا على الطيب مأحد يرضى الميول

والا الردي كلن يبا وقته يميل ويقلعه

والشعر ماهو مثل ماقال الله وقال الرسول

لكن جزيل القاف مقنع والصراحه مقنعه

وانا اعرف الندر من الأقوام واعرف ويش اقول

انا عتيبيٍ قصيده للمعزه يبدعه

والليله الامجاد فوق الضاد وإلمام العقول

الصيت هذا مدهله والطيب هذا منبعه

غنيت وبيوت الثنا تزهى عريبين الاصول

في حلتن عجت بريح العود والدله معه

من طيب روس عيال مخلد بن صنت ومن القبول

ترحيبهم قبل القصر من كم كيلو تسمعه

والمحفل اللي نايف وسلطان فرسانه يطول

لجله عوض واخوانه تدك الجهات الاربعه

عسى قبرن شيخن ذخرهم تحت همال الثعول

مخلد حصان الجود وبعير الحمول الموجعه

عز الله انه كان ركن القوم ويصول ويجول

للدين والإصلاح والفزعه ورايٍ يجمعه

مات وبقى ذكره مع عيالن صطرهم مايزول

لو زال سنجار العراق وطور في مصر تبعه

هامات وأسامي بقت في مستوى صعب الحصول

قد حصلوه اسلافهم عوق الحريب ومصرعه

احفاد بارود اللي بشلفاء وبلجيك وذلول

خلّد فعولن تشهر الراوي وحبر المطبعه

سلايل أبطالن عن عروش المفاخر ماتحول

العزوه اللي كم عقيدن من شداده تنزعه

بني عزيز اللي فعايلهم وقايعها تهول

اشاوسن مافيه نايد للفخر ماتطلعه

قومن مكارمهم تجلت في روايات الذهول

وشيمهم تصون العَهد والحرب طبله تقرعه

مابه عزيزي لا التقى الجمعين يحسب لأي زول

لا والله إلا يقدم وطغيان راسه يدفعه

ذولا مطير اهل البيارق والركايب والخيول

واهل الثلاث المعجزات بسلم والا موقعه

مطير شوق الجادل اللي كنها الريم الجفول

مطير عز الناقة الصفراء وقفرن ترتعه

قبيلتن عاشوا بوجهن طلق ماهو بالفضول

من بحر جده للخليج اليعربي متربعه

خوتهم اغلا من ملايين الدراهم والاصول

محفوفتن هيبه وراثيه ماهي متصنعه

قلته ولا فـ طيور شلوى من يقول ولا يطول

كلن من عيال الحمايل يفتخر في مرجعه

في ظل اخو نوره ماهو ظل المجوس ولا المغول

الآمن سايد فالجزيره والديار مربعه

حنا فدا لـ ملوكنا ولـ مملكتنا عرض طول

الارض جبهه والسما غارات والبحر اشرعه

تمت وهي حرّه وسابق مفخره ماهي رحول

نوماسها في سد وجهن ماغشته الاقنعه