كلمات اغنية أصالة وفخامة متعب بن دخنه 2020

أصالة وفخامة 

قرنست نجد العذية وأصبحت رهن الإشارة

وأستعدت في ملاعب كل مذعورة وعية

واطلعت فوق السحاب وعلقت مجد وحضارة

من مرابط سيدي سلمان مزبان الونية

حاكمٍ لاحط بشته من يمينه في يساره

أتسع مضيق باب المندب ومقلع طمية

كرّم العالم بحرصه للصقور وللصقارة

وحطها في مهرجانٍ قادها للعالمية

بإسم ابوه معزي الله يجعل الفردوس داره

الإمام اللي بسيفة طوع الدار العصيه

وعقبه طويق المسمى علة الخصم ودماره

شامخٍ ماهي تزحزحه الرياح الموسمية

من غلاه وهيبته لامنه حدد في مساره

استتب الأمن رهبة وانخضاع ومقدرية

صاحب الرؤية وناموس السعودي وازدهاره

حط للصقار نادي واهتمام وأولوية

لين صارت قيمة الطير الوحش قيمة عمارة

وصار له شان وبطولات وجماهير وهوية

وصارو اصحاب الصقر عقبه من اصحاب التجاره

من غلاه امكن يحطونه بكرت التابعيه

ابشرو ياهل النوادر بالبشير وبالبشاره

وابشرو بالمهرجان اللي اساساته قويه

جهزو كل اشقرٍ لامن ترفع في طياره

كنه يرسم لآهل الموتر حدود الجاذبيه

ولا طلب فالقاع شيٍ حول وثور غباره

اشجع من الذيب وأقوى صبر من صبر المطية

واقربو بالمغتر اللي في نواظره النعاره

افجحٍ بارز ثنادي والمعنق عنق حيه

كنّ شوفه شوف سيلٍ واطي خشم الزبارة

يبهج القلب الحزين ويشفي الروح الشقية

واخذو الحيطه ترا شوط التحدي له مراره

مثل ماله نشوه وناموس وانفوسٍ هنية

الحماس اللي يطرا والتحدي والإثارة

تبغي اللي خاطره مثل الفجوج الجرهدية

وعادة الصقار يبرز في وفاه او في وقاره

لا يمالي فالطيور ولايمالي في خوية