كلمات اغنية الله يهين الي يهين ابن عمه محسن ال مطارد 2018

دمعي كما عدٍ تصافق بجمه

يروي الضمان اللي حدته السمايم

الله يهين اللي يهين ابن عمه

جعله على الدنيا حسير القوايم

يقعد مكانه لين يطويه همه

عزه يطيح ومستواه يتلايم

جعل الردي تبكي على فقده امه

لولاه ما لحق القبيله هضايم

وان عاهدك خانك ولا فيه ذمه

وعند العرب كنه مصلي وصايم

قصده يفرق شملنا ما يلمه

وفرقا القبيله من كبار الجرايم

من عاف جمعا لابته شاف غمه

لا بد ماتكثر عليه الهزايم

حيث انهم عند الظروف المهمه

ربعك ذراك ولابتك لك دعايم

يرمون خطوى عايلٍ فيه زمه

تومي عليه الجايعات الحوايم

من غير ابن عمك همومك تهمه

تعتز باسمه يوم فعله ملايم

من غير ابن عمك يفادي بدمه

واصدق صديقٍ لك من الناس نايم

من صلب جدك وارض جدك تضمه

مالك سواة وماله الا انت دايم

وان عمك المكروه لازم يعمه

وان قام عزه فانت بالعز قايم

يلقاك بالترحيب لاجيت يمه

ويساندك وقت الرضا والخصايم

هذا الذي لاتستمع فيه نمه

دامك معه فابشر بقو العزايم

ارفع مقامه وامدحه لاتذمه

ينفعك لا ضامك من الوقت ضايم

واختر مكان العز في كل قمه

وخل البيوت الواطيه للبهايم

واختامها صلوا على سيد الامه

اعداد ماتذري هبوب النسايم