كلمات اغنية صروح المجد محمد ال مسعود 2024

صروح المجد 

من دار اخو نوره مقر الوحي ومن اطهر بقاع

عصبت راسي وابتدا المشوار والليل سروي

في وسط راسي ملحمة شعر وخلافات وصراع

حزب انتقالي ماقدر يحكم وشعب فوضوي

اصور الواقع واضيف التجربه للانتفاع

يمكن تصير التجربه للناس جانب توعوي

المجد في قمة جبل ماياصله غير السباع

والا ردي الرابعه دونه يحوّل ويهوي

والحق ما يعطى ولا يوهب و يوخذ بانتزاع

خلك على حقك ياراع الحق صامل و جروي

والهاجس اللي لا بدع بدعه يشد الاستماع

لاخوان شما وجهته ولدار زايد منتوي

سلام ياحمدان بن مكتوم يالحر الشجاع

راع اليمين الحاتميه والجناب النخبوي

الطيب اللي ذكره وفعله مع العالم يذاع

اذا طرالي قلت ياحي الاسم والمطروي

في نشرة الاخبار شفت اسمه وزير ٍللدفاع

وقامت هواجيسي على شانه تزين وتستوي

حرٍ تعلى في صروح المجد واسمه فالرفاع

لانه مايرضى غير بالقمه والامجاد رهوي

يجرّي الهياب و يحب العلو و الارتفاع

حتى لو ان الوقت ذيبه فالطويلات يعوي

اللي جمعها طيب راس وقو باس وطول باع

فعوله تشرّف و تاريخه يعد و ينروي

من طيب راسه ماتعذر فالرياح و فالشراع

تجري السفن مع الرياح بحسب ماهو يهتوي

فزاع لامنه فزع ماقال قدر المستطاع

ياعنك منهو يزهمه يارد على العد الروي

تجيه الانفس ضايقه وتروح من عنده وساع

يعوّد الفقري من اهل الاقتصاد التنموي

الراس يقدح بالسطر و النخوه لحد النخاع

ياحي راس ٍ للمواقيف العظيمه مهتوي

العز ماخذ جرعته فزاع من وقت الرضاع

واليوم صارت سيرته للناس دافع معنوي

ياطيب سيرة طيّب السيرة ومحمود المساع

اللي من الامجاد والامداح دايم مرتوي