كلمات اغنية الخبب موسى العميرة 2024

راكب اللي (بالخَبب) رميه بعيد = كن زوله عرضت عيال العرب

عرضت اللي لابسٍ في يوم عيد = أزين ثيابه لا شاف اللي يحب

يطرب اللي راكبه بعذب نشيد = والنشيد يزين إذا زاد الطرب

منوة اللي بالتَحمل ما يحيد = ما تحيــــده لزة خيولن شبب

الله اللي مده الحي المجيد = بالوصوف اللي لها الشاري طلب

قال في وصفه يبي شكلن فريد = يفرقه بين الخيول اللي تطب

لا رفيع ولا قصير ولا بليد = وان هذب ما تلطش يديه الركب

عادل الساقين سكات الحديد = مابهن حوسه ولا فيهن حبب

مفرق العينين شبر(ن) ما يزيد = وان شبرت الصدر زوّد لا تهب

والمناخر لا صهل قبل المديد = يشبه انفاق الشفاء لامن سحب

والاذاني مثل رادار الطريد = يتعب اللي يطرده لا من هرب

ما تقصص جادله ملهوف جيد = كنها الراية على الرجم انتصب

ناصب عنقه ومشواله شريد = من الحواسد شرهم أكفه يارب

لا شخص بالعين تفهمها وعيد = لو تهوشه ما رمشلك بالهدب

قاسي(ن) راسه ولا هو بعنيد = بالسياسة ينتسايس والأدب

جاهز قبل السبق ماله نديد = بشر اللي جهزه كسب اللقب

حدّدَ المفحام في قارمن جديد = بالكناتر والمسار وبالخبب

لا نهض من موقفه نهضة عقيد = صف عسكر معتدله ما اخترب

والحوافر لبسوه من الحديد = شوف عيني بالصفا تقدح لهب

يشعل جروم الغضى منه وقيد = واستوت لقدورها شب الحطب

يقطع الجولات بالعزم الشديد = متعب خصمه وباسه له صعب

يوم غيره لا فتر حيله وحيد = خايب سده وسد اللي ركب