كلمات اغنية حقوق الوسم نمر الجذع 2023

حقوق الوسم

ياربّي ماغير ظلالك اللي يظل ظلال

عيوني من الخشيه تهامل مدامعها

اقفّي واعوّد لك ، واقفّي واعوّد ذال

ترا النفس عن ماتشتهي دايم امنعها

انطّح همومي كل ماضقت منشا خيال

عن الديره اللي ضيّقتني شوارعها

اليا بكّر الوسم بحقوق المطر ، وانهال

تمثنيت نجد ونالت النفس مطمعها

ابا الوادي السايل من الجال لين الجال

تصب الشغايا فيه ماها ، ويجمعها

جزت نفسي من الوصل ماعاد تبغا وصال

ولاعاد فرقا اللي تحبه يروعها

انا احب وضحاً حبها لـ الضمير هبال

خذتني وانا راضي وسجّت وانا معها

عن الخلق صدتبي وعن لجّة العمال

مغير الهبايب وام سالم اتساجعها

لاقامت تخف المشي وتدوّر الزرفال

قلوب العرب يمكن من الولف تشلعها

مثل مشي غيداً عجلةً تبغي المدخال

توطّا من الرمضا على روس اصابعها

يخفخف لها لاسمعت الصوت والهوبال

هذا طبعها ، قبل العراقي يطبعها

كبر قله وعظماً طويل وحلا وسبال

ورقبةً من النسنوس من فوق مطلعها

عقب قيّضت مابين رمث وفياح عبال

نفضها الحيا والعشب يخلف روابعها

نوانا ، مع اللي تنتوي والنوايا عقال

ديار انتعداها ، ودار انتدرعها

تلافت مقاودها على الفاطر ام جلال

وعلى لجّة المقهور قدام ندفعها

هي لحال والمقهور يردع وراها لحال

انثقّل لها المقهور يادوب نردعها

اليا حوّلت في وادياً تو سيله سال

تخبّط وتلعب والمسايل تكرعها

انا احبها حب الحزينين للاطلال

وادوّر مثل رزقي من الله مراتعها

ورثنا محبتها وحنا ، بعدنا عيال

لها صدورنا مثل الصحاري نشرعها