كلمات اغنية طروق الغرام نياف تركي 2023

ادبح الليل وانقاد النسيم وتنبه

خاطرٍ من صواديف الزمن فيه حرّه

الطواري لها ساحل وللشوق غبه

من نطح موجها تحرم عليه المسره

ليت قلبي ذعاذيع الغلا ما تهبه

وليت عيني تجود بدمعها ما تثره

كيف ابسلا وانا اطا كل ليله مربه

وتعترض صورته واقول لله دره

تهت مابين عنق وبين منحر و لبه

وعين حر وجديلٍ ضافي وخصر حرّه

قد طلبته وانا المطلوب مانيب احبه

وقد تبعته وانا مانيب تباع جرّه

كنت احنّه من هروج العتب والمسبه

و كنت ابره ولكن ما يعرف المبرّه

ويوم شفته يبا الهجران من دون سبه

وقام يكثر علي من العتب و يتشرّه

قلت درب الفراق اللي تطريه ذبه

واخذ معك الغلا الباقي بخيره وشره

قال قلبك قسى بعد الوفاء ؟ قلت صبه

ما بقى في مداهيله للاشواق جرّه

من طروق الغرام ومن دروب المحبه

سامحٍ خاطري ماعاد لي شف مره