كلمات اغنية مقناص العراق هادي بن جابر 2023

مقناص العراق

يسقا ليا قالوا بعد يوم ماشين

وكلن تفقد عزبته من زهابه

والفجر مع فلاج الاصباح عجلين

القلب واحد والعزايم تشابه

وسويت من سفوان فيزه وتامين

حتى رسوم الطير دافع حسابه

ومن بعد ما تقضي من الجيم والسين

ختم لك الجمرك بطيب ورحابه

تليتها مرواح بين الصلاتين

تبغى الخلا قبل العتيم وغيابه

ثم جيت من بين السهل والشعيبين

ما تسمع الا صوت سحم الذيابه

في خايعن ممطور من حول شهرين

تعاقبت الامطار ديم وسحابه

قامت تفاقع بين خمسه وثنتين

وكلن على الهدات يشعم ركابه

احدن مسند له على جير شاهين

واحدن معه مجهول ما يندرابه

وانا معي شلال طلق الحجاجين

قرناس من وجهه تشوف العشابه

ماهو بتفريخن ولا هو بتهجين

من ماكرن للحين محدن درابه

بكر اخلوي فيه الاصاله عناوين

ريش الحويل امع الجديد امتشابه

سمّن على الخارم عذاب ام روحين

كم من غلب خربن نشيط التوابه

له وجه كنه وجه ملحق مخلين

وله مخلبن لدما ما يبرا صوابه

عندي على ما قول ثبت وبراهين

ومنهو نشد بعطيه رد الاجابه

ولا يسمح الخاطر ولا يلين ويزين

الا ليا عديت روس الهضابه

واخذت بالمقناص من فوق ستين

ما تطري المنكاف ولا انقلابه

من جال الابيض لين النهيدين

ما فيه روضن موتري ما مشابه

وصدنا وطبنا كلنا مسفهلين

في طربتن تسوا العمر مع شبابه

مع رفقت ارجالن كبار وعزيزين

اصغرهم الطيب حشيمن جنابه

ومن لا تعب بالطير وذاق الامرين

احسن يبيع الطير ويصك بابه