كلمات اغنية بيتك المهجور احمد الغامدي 2021

تدور الارض وتدور السوالـف والسنيـن تـدور

وانا لو أعرف اللي راح ماني بـعـرف الباقـي

يقولون القصيد شعور .. والشاعر بـدون شعـور

واقـول الله يعاقبنـي اذا ماهـو مـن اعماقـي

أنا لو أكذب بشعري وقف نبض ويبـس حنجـور

وقادر أخسـر الدنيـا .. وعاجـز أخسـر أخلاقـي

لجل عنق المها والصوت الادفى والعيون الحور

وقف عمري ولا ادري ويش انا من وقفته لاقي

قسم بالله ماقبلك غياب ولا بعدك حضور

ولكن ودي بفرقاك لو ماودك فراقي

تعاتبنا بما فيه الكفايه من ثمان اشهور

وسالت دمعتين وطاح قلب وماتت اشواقي

تعدتك المشاريه وجفاك اللوم والمستور

اذا مايكشفه صوتي كشفه الحبر باوراقي

تعبت اضحك على نفسي وابرر واعيش الدور

تعبت اجامل ظروفك واصدق كذبك الراقي

يكفيني أغيب وخافقـي ماجـاك منـه قصـور

ويكفيـك أتذكـر كـل ليلـة لهفـة اعنـاقـي

تذكر يـوم أخليـك اتباههـا كبريـاء وغـرور

يوم اني أتحـدى بـك وأخيـب هقـوة الهاقـي

وتذكر يوم أعذرك وانـت لاصـادق ولا معـذور

أدور لـك عـذر وأصدقـه وأكـذب أحـداقـي

وتذكر يوم جيت من الحزن متضايـق ومكسـور

فرشت لك الضلوع وقلت لـك ياسيـد عشاقـي

خذ ضلوعي وابن فيها يسار الصدر بيت وسـور

ترى مافيه قبلك من سكـن صـدري وخفاقـي

وبعد هذا رحلـت ولا بقـى الا بيتـك المهجـور

والا ياكبرها لا من رحلت ومنزلـك باقـي