كلمات اغنية مفخره الجفراني - جابر بن هضبان 2025

مفخره 

طالت علي لايام بالحال الرتيب

ادور الواهس على الشعر ادوره

حتى لو ان مالي على الجمه شريب

احيانًا تصد القريحه مجبره

كنها هنوفٍ تنتظر جية حبيب

قد لدها من ربعه وطال اسفره

ما تنجذب لا من بعيد ولا قريب

يصيبها من كل خطاب انعره

كم رادها مرهي وعيت تستجيب

مكتفيةٍ في طيبٍ شاع اخبره

من غير ابن جلبان ما تبغى نصيب

اللي مزودها غرور وبختره

هذا راع الرشدا لا جاء الامر العصيب

ابسل على الخطب الجلل من عنتره

الواثق اللي فيه ظنك ما يخيب

الصامل اللي للشدايد تذخره

لا كلحت لايام لك بـ انياب ذيب

نصرك على الايام لا طق انحره

بالسمعه العطره وبالراس الصليب

يسوقها من مفخره لا مفخره

لو شاب دقنه قو باسه ما يشيب

من دون غاياته يعاف المعذره

ما صار في منبر هل الناقه خطيب

الا وهو مالي مكانة منبره

خذا الثقه منهم وزاد الطيب طيب

ما فكر بمن حب ولّا من كره

في كل شوطٍ محتدم قوه يجيب

اللي يوقع شيكها من دفتره

جايٍ لهم بيضيّق الكون الرحيب

عمم على الاشواط فرض السيطره

ان ما سمع لمنافسه جرة نحيب

ولّا لمح لـ اقفايته منه اغبره

من جاء يبي مراكزه عوّد عطيب

ما قدمه الا غبنه ولطم انظره

معه شهران مدلهة صدر الغريب

يقلط بنا على العسير ويقهره

امجادنا من هازها مقطوع صيب

يلقى كحل عينه ولعنة كوثره

نجمٍ على دور الليالي ما يغيب

والى هوى حط الفسيحه مقبره

لو يسلك الدرب الخطا ولا المصيب

حنا الحزام اللي يشد ابه اظهره

حنا شهارين الوغى غم الحريب

لا قلّت الحيلات من ولْد المره

نقبل على اللي دونها الهابي يهيب

ما حركت في صملة الروس اشعره

اشاوسٍ لا ركبت امات السبيب

ما تاخذ من الخصم عفو ومغفره

ان ما قعد تحت الرمك منهم صويب

ولّا خذت روحه طريق الحنجره