كلمات اغنية البعد والهجر حشان ال منجم 2019

المشتحن طر هملوله وماجاله

ماذاقت النوم عينه يابري حالي

الليل لامن ضوا يضويه غرباله

والصبح يدله ولكن ماهو بسالي

ارقد بهمي واقوم وحالتي حاله

وافز من مرقدي دركِ ومتبالي

نار الهواجيس بأقصى الجاش شعاله

وقايدِ جمرها في القلب شعالي

الافكار في راسي المنحاس شغاله

من غيبة الشمس لينه يذن التالي

حزين ومفارق الخلان عزاله

عزي لمن هو فقد له صاحب غالي

ماعاد من ذكرياته كون جواله

رقمِ مخزن معي في وسط جوالي

مقفول له مدةِ مايقبض ارساله

ون جيت ادقه يرد الهاتف الالي

عليه دمع المحاجر هل سباله

يهل غصبا وانا امشه بدسمالي

ليته يعرض علي واشوف وشحاله

حتى اتطمن عليه ويهتني بالي

البعد والهجر يالمجمول مااحتاله

سوّه يجي في صميم القلب طوالي

عليه مني سلام(ن)طيب(ن)فاله

عداد ماأنشى من القنفان همالي

غصون الاشواق له بالحيل مياله

واشوف صورته دايم وتهيالي

ودي اتقهوا معه فنجال وبياله

واخذ معه في الهوا ممسى ومقيالي

هذا مرامي من الدنيا وما اساله

وغايتي من حياتي يابري حالي