كلمات اغنية اجازة محارب خالد ال بريك 2025

ودي اطلع من طقوس الشعر ولا اصك بابه

واخذ اجازة محارب لا اتصال ولا رسايل

كني في صدري مصاقل حصن ومعاوا ذيابه

واشتباكٍ يسرق انظار العرب والدم سايل

لازم ابعد عن ضجيج الناس لو اسكن بغابه

مدعين العرف من تالي يضيعون القوايل

واتمشى في رياض الخبت لا طاحت سحابه

من فيافي نجد لين الدبدبه وجبال حايل

فوق جيبٍ سايقه مطنوخ لامنه سرابه

استوا الخط المزلفت واستوا بدع المثايل

بدر ابن مصلح رفيق الجنب سيفٍ ينغزابه

من بني عمي هل الوقفات مروين السلايل

يحتزم بي واحتزم به محزمي وقت الحرابه

عاش محمود الخصال وعاش كساب الجمايل

وسلوة الخاطر تبى الي محدٍ يفقد غيابه

مستريح امن الظروف ومستريح امن الهوايل

مار انا شاعر مواقف واتكلم بسم لابه

اكتب الشعر الحقيقي واحفظ امجاد القبايل

وفي محل الي لهم تاريخ وامجاد ومهابه

مرحبا ترحيبةٍ ما مثلها والشك زايل

بسم ابوعادل رفيع القدر ارحب بالنيابه

والعضيله عادته يكرم ويعدل كل مايل

عند معلث طيب الجدين فعله يقتدابه

من رياجيل الفعول ومن رياجيل الصمايل

حاتميٍ عزالله ينفض الي في حسابه

جاهه يحل الصعاب وقفته تشف الغلايل

ياجويد جدت ويمينك كرمها ما يشابه

تتعب اكرام السبال وتتعب عيال الحمايل

عبدليٍ لا بطش في ماقفه كلٍ يهابه

طيب راس وطيب ساس وفاللقى يابس بلايل

ويا فهد فيك الكرم معمور ومنوخ ركابه

من على جدك وابوك القرم ماضين الفعايل

ابن معلث يردع الاخصام في وقت المجابه

محزم مليان في وقت القشر والراس طايل

و مجد حمران النواظر مشتهر كلٍ درابه

فعلهم قولٍ عليه اثبات ثبت بالدلايل

مطير تاريخ مشرف من على عصر الصحابه

الثلاث المعجزات بفعل ما جت بالتحايل

هم هل البل من زمانٍ فات ماجتهم نهابه

ورث من كابر لكابر واحتموها بالصقايل

قاري التاريخ بيشوف المفاخر في كتابه

نعم فالمطران ساس الجود وافين الخصايل

والولاء لخوان نوره والوطن نفدا ترابه

دونه حده نردع الظالم ونلطم كل عايل

ياوطنا كلنا نحماك ونزيد الرقابه

احتزم بجنودك الابطال وبشتى الوسايل