كلمات اغنية افرح ياصدر خالد ال بريك 2024

افرح يا صدرٍ معتريك الهم والحزن المقيم

إلى متى ؟ جوّك مثل جو السجون المقفله

افتح ملفات الغموض اللي على الرف القديم

وانفض غبار اليأس واصحى للسنين المقبله

أنا اعترف بنّي مزاجي والمزاج اكبر خصيم

والنفس لوامه تغيّر كل حين بمنزله

احيان اشوف الراحه بصوت الحذيفي والشريم

واحيان اطوّل صوت ابو نوره لا غنّا ( مذهله )

واحيان اقول العمر رايح والرجاء دار النعيم

واحيان اقول المال ضلعٍ من ضلوع المرجله

من خلقتي ما ارجي بخيل وْلا كريم الا الكريم

اللي عليه معلق امال العمر …. وموكله

نتعب ونسهر والشقى مدبول والخافي عظيم

من لا تعب لا نافعٍ نفسه ولا نافع هله

ان ما سرحنا الصبح نسري لااظلم الليل البهيم

ولا شبكناها سوى من بهذله في بهذله

جينا ورحنا واختلطنا بالمعافا والسقيم

واخطر مغنّ السقم لا شفت العقول مغفّله

يا لعنت الوعي الله انه يلعن ابليس الرجيم

غرّبتي العقل اللبيب اللي سبق مستقبله

كنّه يعيش بغربة اهل الكهف وأصحاب الرقيم

اليا تقدّم مشكله واليا تراجع مشكله

ماله نديم الا الشتاء والنار والليل العتيم

اليا لقاها ينتقل من مرحله لا مرحله

يرتاح باله من علوم اللي يزيد الضيم ضيم

ويطلق يدينه من يدين الواقع اللي كبّله

لا قام يردم من عرانين الحطب فوق الهشيم

تقول بيسوي جمل ماهو مسوي مهيّله

هذي طراة العمر ودْوا كل جرحٍ فالصميم

ما مثلها إلا رفقةٍ تاخذ من المدح اجزله

لا جادت الدنيا براسٍ ينحر الخطب الجسيم

حطه يمينك والكلام اللي على بالك قله

شروا سنافيٍ ما جابت مثله بطون الحريم

له فزعةٍ تروي معاطيش الكبود الممحله

أرسى من جبال الهدا وأنصح من الرأي الحكيم

واذا زهمته فاللزوم العَجْل جاء فيه عجله

طارق بن محمد عديم وناجبه عودٍ عديم

ما بينه وبين الردا واهل الردا عرق وصله

عدٍ عذي لصحابه وسمٍ سقطري للغريم

وجهه مقدّر واسمه لحاله يحلّ المعضله

هذا ذيابيٍ ربا بالعز من يومه فطيم

وشلون يوصف بالكرم واصل الكرم من منهله

تزاحم الافواج كنْهم بين زمزم والحطيم

على مضيفٍ بالوجوب مكمّله ومجمّله

يشكون من يمناه عشّاق النوادي والرجيم

ما عاد ينفعهم جهاز السير مشي وهروله

صارت جداولهم من عيال العشاير لا النعَيم

ما بين سمّو وارحبو فـ آخر نهاره واوّله

يابو محمد سيرتك عطره ومنهاجك قويم

مواقفك من طيب راسك مضربٍ للامثله

ينصونك عيال الأكابر والمواطن والمقيم

منتب لحد من دون احد واللي تريده تفعله

الله يديمك للكرم والمرجله والله يديم

هيلاً تهايل بالمفاخر والفعول مهوّله

حنا عتيبه ما يذم امجادنا غير الذميم

ينقد على شي أكبر مْن اسمه وحقده ينقله

القلب لا منّه دخل فيه الحسد ماهو سليم

حتى لو ان راعيه من غرّ السحايب يغسله

ياعزّ راسي يا مفرّقت الحميم مْن الحميم

قدّام لا يحكم معزي وأكثر الخلق جْهله

اليا اعتلينا فوق سرج اللي تكاظم بالشكيم

كم راس شيخٍ من متونه للسباع نحوله