كلمات اغنية الطيب المطنوخ خالد ال بريك 2024

كل ما خيم علي الليل في نجد العذية

ودي امشي في طريق ما يرجع من مشا به

السواد الحالك يوتّر عيوني في مجيّه

لو ماعندي ظروف و لو مافيني كئابه

الدروب الجرهدية و الليال السرمدية

تجتمع مع عزلة الانسان ف بداية شبابه

بس اعرف ان الحياة ايام و الدنيا دنيّه

و البنادم لـ انتهى يومه يضفنّه ثيابه

ودي اني ف اول الاسلام بعد الجاهلية

عايشٍ وقت الرسول و عايشٍ وقت الصحابه

اول آمالي مصافح سيدي خير البريه

و اطلبه يدعي لي الله يوم دعواته مجابه

و اخر الامال مستشهد و سيفي في يديّه

ناشبً في صدر كافر ما قضبت الا نصابه

ادري الاحلام ما تقرب حدود الواقعية

ما تحقق فالحياة الا بدعوة مستجابة

و ادري ان الشعر له معنى و قيمة معنوية

في عيون الناس و الشعار محسوبً حسابه

و ادري ان المدح لو عدّا الحدود العالمية

كان ماهو في رجل يستاهله محدً درى به

الكفو و الطيب المطنوخ اله حقً عليّه

امدحه لو كان مابيني ولا بينه قرابه

مثل خشمان اخو مسلط راعي الكف الندية

لا يكل ولا يمل عن المراجل من شبابه

شيخ فالدنيا بـ دين و فعل و عزومٍ قوية

العلوم الغانمة دايم يحث لها ركابه

المراجل ما تليق الا على رجال زيه

لو يقال المجد ابن خشمان قلنا لا غرابه

مجلسه معروف مثل العاصمة و الفيصلية

اخذ من نجد حيّز بالمساحة و الرحابة

ما يوقف فيه فنجال الدلال الشاذلية

و الصبي بالعود الازرق واقفً قدام بابه

و انت يالعبسي فعولك فالامور المفصلية

تعتق رقابً لها مدة تحت عين الرقابه

لك قبول ولك محبة في قلوب الاغلبية

وفي عيون الناس لك تقدير و إجلال و مهابه

ان وقفت يوقف التاريخ فخر و مقدريّه

و ان حكيت تدرس الاجيال في فن الخطابة

يوقف التاريخ يا خشمان و يدّق التحية

كل ما شافك يغني مرحبا به مرحبا به

بينك و بين الكرم عقدً مديد و جاذبية

تغني الفقران بعد الله و يكرم من حسابه

مدتك تربك حسابات البنوك المركزية

كنها همّال وسمية من عروق السحابه

كيف نستغرب عطايا كف يمنىً حاتمية

و انت روّقي من قبيله فارقه عن كل لابه

فعلهم معروف من وقت العصور الاولية

يكرمون الضيف قبل الضيف يعطيهم خطابه

والله ان الدلبحي و الطيب يجمعهم هوية

ما تغيّر لو يشد طويق في جنب الغرابة

يعشقون الكايده ما يعشقون العايديه

لنّهم هم محتوى التاريخ في فهرس كتابه