كلمات اغنية الهذلان دروع خالد ال بريك 2024

الهذلان دروع

ياحمام الورق علماً في ضميري ماتهيا

وانت ما تدري عن ظروفي وماتخفي السريرة

الحقيقة كلما غنيت مطلع قاف عيّا

ودي ابدي به على مرقاب مايبديه غيره

الشعر له عام سبب بين خلق الله جفيا

والعمانية سرت بعد العرب حاسوا مريره

جنبوا عنه الرموز وسلّموه اصحاب هيا

ما يحسبون الامور ولا عواقبها الخطيرة

مايصملني عليه الا المواقف والحميا

والمواقف دين في رقاب الرجال اهل البصيرة

مرحبا في مرحبا في حفل من رحب وحيا

في المكان اللي مع التاريخ له ساير وسيرة

ياعيال العود زبن اللي من الضيق يتعيا

صفكم لا يفترق وقلوبكم تشتب غِيره

كم توجّدنا على روساً فَنت والذكر حيا

موتهم يحرق معاليق الحشا حرق الظفيره

ياعسى يسقي تراب قبورهم نو الثريا

يالطيف الارض ماتشبع من الأسماء الشهيره

كلنا للموت لو امن الكِبَر نبلغ عِتيا

والحظيظ اللي يخلف له ولد شباب نيره

وانت ياممدوح يامال الشحم سمح المحيا

ياولد شيخاً تردد سمعته في كل ديره

في الكرم ماله سمي وفي الوفاء ماله سميا

الشجيع مجرّي الهياب لاجات المغيره

اشرب بيمناك دامك جالة العد الرويا

عندك اخواناً محازم ظهر وسيوفاً شطيره

كم من اعيال الشيوخ يروح ويعود بليا

وانتم اصغركم نعدّه للمهمات الكبيره

المثل قال ان ليل العيد باين من عشيا

والرجال تميز الحُر النداوي من مَطيره

عقّب اللي عن سموم الشمس في الظل يتفيا

لاتحزّم به وهو مايحتمل شمس الظهيره

قلتها عن ربعي الهذلان مافيها غْبيا

عسكر البارود ودروع الحجاز اهل الذخيرة

علّم المرسول لايركي على الضلع القصيا

وهّقوه وطش حبه في الرحاة المستديره

اصوك الجدين مايُقدم على هذي السويا

ياخذون السيف من كفه ويعطونه جفيره

له حكايا من هناك وله حقايق من هنيا

السوالف لايطولها وهي كانت قصيره

صيت برج المملكة والفيصلية في العليا

ماينافس شهرة الهذلان في شبة الجزيره