كلمات اغنية بعض الغياب خالد ال بريك 2024

على بعض الغياب العذر منكم يـ اقرب الغالين

مع اني معرف اوضاع الغياب ولا اعرف اسبابه

عن اللي يعترض لي في طريقي مامعي تامين

موكلها على اللي عن عباده ماقفل باااااابه

اجي واروح في دارً مناظرها تسر العين

مناظرها تسر العين .. لو ماهيب خلّابه

على ضغط السنين وحملها الجاير صبرت سنين

طموحي كل يوم يزيدني لو زادت اتعابه

عسى ربي يصبرني على الايام لين تزيين

وعسى عزمي على مر الزمن ماتبرد اعصابه

لو يطول انشغالي ماحسدت العالم الفاضين

مايحسدهم سوا اللي مامعه عقل يتلهابه "

رهين الضيقه اللي مايغامر بين حين وحين

تغداه الظروف .. القاسيه ولا تعشابه "

ليا مات الشغف كنك فقدت عيونك الثنتين

تضيع ابسط حقوقك في الحياه وتوخذ نهابه

تحرر من قيودك لين تاصل للحيا والدين "

لاوصلت للحيا والدين كلً يحسب حسابه

انا ضد القرار اللي يقول العب على الحبلين

لو ان الوقت يلعب لعبته والناس لعابه.

لاياخذك الحنين من الحياه وتتبع المقفين

ياكم من واحدً راحت حياته يتبع احبابه "

بعد ماطول الموضوع لازم نكسر الروتين "

بحول الله نجيب المستحيل اللي محد جابه

ياحي الوافي اللي مايجنب سكة الوافين "

على شان المراجل والمكارم يشعب ركابه

تبجح ياحمود وعدني واحد من الاثنين "

حزامك فالقسا ولا الخوي اللي تعزوابه

خلف خّلف عيال ماتخاف من الزمان الشين

ماتحسب للزمان الشين مهما دار دولابه "

مامات اللي معقب له عيالً فاللزوم تبين

رجالً كل واحدً في المواقف يفتل اشنابه

اشوفك يانقاء واشوف ضاوي فالطريق يمين

طريق الغانمين اللي مشيتوه ومشينابه

يعيشون الخوان وصفهم ماينقسم صفين

ترا الطيب يموت .. ولايخلي سلم شيّابه '

حداهم لـ انتهض مافكر الدنيا تروح منين "

حرارً كل واحد يخطف الصيده بمخلابه "

ثقالً ماتهاب وفالمواقف والطلب عجلين

هذولا هم رجال المعرفه والسيف ونصابه

فداهم راعي اصبر لين اشوف وخلها بعدين

قليل العرف في وقت اللزوم يموت في ثيابه

لو يلين الجبل ضلع العصيمي مستحيل يلين

ضلوعه عزمها اقوا من جبال القاع وهضابه

اشوف ان العصيمي فارق بفعله عن الباقين

قلط بسمه على راس الفخر واحتل مرقابه

حصون ديارنا مركي عتيبه خل سور الصين

هم الركن الذري كان الزمن كشر عن انيابه "

مقاديم السرب يوم العزاوي والنهار الشين

اسودً تنطح وجيه الخصوم تقول في غابه

جموع الاد عاصم لاتناخو والتقى الجمعين

لهم وقعً على نحور الخصوم يبين مضرابه

هنا التاريخ والمجد القوي والسلم والتمكين

هنا الاسم المشرف والفخر والساس واللابه

هذولا هم مقابيس الوغا والسيف ابو حدين

وحد السيف تبقى هيبته لو كان فـ جرابه