كلمات اغنية سهيل في كبد السماء خالد ال بريك 2024

سهيل في كبد السماء تكى مثل شيخ الشداد

والقاع قام يغازل بروق الحيا و نصوبها

وقامت على روس الهضاب تغني انسام البراد

اللي على منكوسها واللي على مسحوبها

والبدو احالوا بالطروش وفكوا زمول الهداد

وازن الشديد و كل حله قلطت ماجوبها

والارض ثار غبارها مع جرة الروس الجداد

وحدب الكباري غصت وقامت تضيق دروبها

الله يجيب الي تصب الوبل وتعم البلاد

دهم المزون الي تفرا بالقراح جيوبها

وسميتن ترخي همايلها على وجه الحماد

مثل هميل الي تنكس بالحياض غروبها

وطاح الحيا وانقادت الوجهة على الراي السداد

لامنها قامت تفتق بالفياض عشوبها

شفوف بدوٍ ماتفكر في علوم الاقتصاد

مافيه شي غير حب البل يتل قلوبها

تلقى سوالفهم ماغير عْن المزاين والمزاد

وان حصلوا صمخ النوادر للسماء طاروبها

واليا ابتدى شوط التحدي والمنافس والعناد

سبع القبايل يخلف الضلعان دحم جنوبها

تقدّم اللي مايشيل الراس الاصوك للرقاد

يرمي بعمره في جحيمً يصطفق لاهوبها

لا صكته سود الليالي صك راسه ب القناد

وان كبرت الدنيا ( خطب ) منها كبار خطوبها

ياحامد بن سعود في يدك الفتيلة والزناد

والحربة الي من يمينك ماتطيب ضروبها

تبشر اهل الشعل في جرح مايلقاله ضماد

مبريتن لاوقعت فج النحر عذروبها

ايقومون صفوفهم واسمك يخليها جماد

كبرت هقاويهم وجتهم قوةٍ بلشوبها

ضربتهم في عزمك الراهي وبالهزعا السناد

وعزومهم جبت الرحاة الي تلم حبوبها

وين انت ي اللي تعتزي بالقوم وتخبط الرماد

عان المنصه كان عندك علم وجّه صوبها

جرد الرقاب اللي مثل جرد المراهيف الحداد

جاتك تهادر و القبيله مع طرف جندوبها

نلعب لها لعب الشيوخ اللي ضحى يوم العياد

والبشت ابوشمسة يعلق مع جرس دبدوبها

حنا هل المجد التليد و منبع البوش التلاد

كم فاطرن نركي بنادقنا على عرقوبها

معها عتيبة خيرة الفرسان في يوم الطراد

على صهاة الي تسمّر ب الحديد كعوبها

قحص المهار الي تفحّم للصباح وللهجاد

الي تطيشها عزاويهم ليا لجوبها

اقلط يابن سمار والحساد بيدهم بياد

والجايزة لاجيتهم يبطون ماقفوبها

بدروبهم ثبت علامات الخطر والابتعاد

خل الصياهد ياخذون سنين مالدوبها

وازهم على سلطان والاخصام تبشر ب النفاد

قدام لا تحسب خسايرها تحسب ذنوبها

وش عذرهم من فارعٍ ماضرها لدغ القرد

تضرب بيدها دون مركزها وتمشي دوبها

مثل الهنوف اللي ترش المسك وترش الزباد

الها ثمان شهور مشفيتن على محبوبها

ذابت قلادتها عقب طول البطى فوق الفواد

واسمه على مفرق نحرها رقعتن من ثوبها

والفرق واضح للعرب بين التمركز و الحياد

والسلعة اللي مالها قيمه تبين عيوبها

ماقدم ( سمارات ) واهلها عساهم ف المراد

الا البيارق و النخب كم مرتن فازوبها