كلمات اغنية ما علينا من وجيه كنها زل القفاري خالد ال بريك 2025

بين ذعذاع الهبوب و بين هجمات الطواري

استفز الليل جنحه للقلوب .... المستضرّه

و ارتكز نجم القريحه في نحا سود الغداري

و ابرزهت من بزوغه .. كل نجمه بالمجرّه

حالفن لا ارهي عليها لين ترضخ لأنتصاري

وانضم اعداء النجاح بحبل مسباحي وافرّه

ادرك ان الوقت جوره لا يحنّ ولا يداري

مير لا تخفض جناحك ذات يوم و لا تبرّه

واجه الدنيا بـ راسن في الملمّات انتحاري

و اخذ قلب الزير سالم في لقاه عيال مرّه

احتزم بالصبر لو قامت تناهشك الضواري

من قبل بالذلّ مرّه .... ما يذوق العز مرّه

و احمدالله ما انوخذ لي شي لجل اخذ بثاري

دون وجهي ذي يميني لاطمه ..... و الا اتشرّه

ما علينا من وجيهن كنها زل القفاري

لو غلت قدام اهلها فوقها للرجل جرّه

افتخر يا راسي اليا من بدا .. للفخر طاري

ما يليق الا فصيح ...... و شاعرن لله درّه

في مطير العز اباقف واجهر بصوتي و داري

الفخر حنا مقره ....... و الشعر حنا مقرّه

ياهل الردات ربعي ما لقينا .... للمباري

في زمانن ما يعيشه غير منهو كان اشرّه

لا اعتزينا ينفتح في خصومنا باب العزاري

و خيلنا ما تعرف الا تلحق ..... الكرّه بكرّه

ما عثـينا بالهزيل و لا بطشنا ... بالحباري

حذفة الشيخ المجوّخ كنها فك ... الازرّه

ساعتن تعرض بها الارواح من بايع و شاري

قد جلبناها و اخذنا للثلاث .. المشمخرّه

وغيرها يطرخ علمها من قبل ذات الصواري

في حجى المجد المخلّد لا تزال و مستمرّه

من يمينن رميها للمال كنه ..... رمي ناري

جعل يفداها يمينن تجمع المال و تصرّه

عنها ينبي المقام اللي يقدي .. كل ساري

من سنا نار ابلجن للضيف ما يقفل مقرّه

مرحبا ترحيبتن من صدقها ... كن البخاري

قد ذكرها في الصحيح و جابها عشرين مرّه

يا بدر ذخر القبيله كيف اقدم ... باعتذاري

وانت قرمن ما ذخر من دون ربعه كبر ذرّه

بالنوايب تنطح الماجوب و تفض الهذاري

وفي اخوانك كل مدحه درهمت درهام حرّه

لو نسلم في يديكم خزنة البنك التجاري

ما مست ليله وكل المال ... للعالم تثرّه

مثل فعل جدودكم لا جا اللزوم الاضطراري

و من عمام ومن خوال بكل عيطا مستقرّه

يا ذخاير مزيّد اللي في مواقيفه .. نماري

يا عسى يفدونه اللي مالهم بالطيب جرّه

من ذوي بطي مقاديم السرب واهل الشباري

في نهارن تدّحم فيه .. النفوس المستشرّه

دون خرعوبن تبوج القفر و تخضّ الخباري

نبجد الجمع المهيب .... ولا تلحقّنا تشرّه

ما على وجه البسيطه مع عزاوينا مجاري

لا اعتزينا بالعضيلي و الليالي .. مكفهرّه

دقلتن ما تنتناحا .... بالمشوّك و السواري

العضيلات العظيمه ...... فعلنا كلن يقرّه

يشهد بمحوالنا يومن على حمر العتاري

يوم حوّلنا سوات النار .... من بركان حرّه