كلمات اغنية ندر الوضح خالد ال بريك 2025

ندر الوضح

هاجسٍ لا مالت سدول المسا ميّل حباله

و الضمير الحي لا يمكن يرجعهن عواري

نوب واقعه المرير و نوب يستنجد خياله

الوكاد انه خويٍ لي بعتمات المساري

ما كسب من فاتن الأفكار غير اعرق سلاله

حب شيخات العروش و عاف حسنات الجواري

حتى لو ابليس يغويني على درب الضلاله

اتبعه لكن ما اطوّل معه و اصحح مساري

لو يقولون اشرب الفنجال لا تشرب بياله

ما يضر انك تقهوى لك بياله و انت ساري

بث روتانا زمان و بث روتانا رساله

شاشه لعادل امام و شاشه لكتب البخاري

المهم ان القصيد المعتبر لا جا مجاله

قلت قول ابن ربيعه لا جوار إلا جواري

أبتكر معناه و اترجم شعوري من خلاله

واذخره دون عنزه ربعي خويٍ لي مباري

من يبشّر لابته بالفوز يبشر بالجزاله

من غلا الندّر و راعيها تباطيت انتظاري

عند عبدالله و عبدالله بذل جاهه و ماله

تشهد بطون الدلال و تشهد جنوب الشباري

وايليٍ لا اعتزى نصره محقق لا محاله

يضرب القاله براس اصوك و تفكير انتحاري

لا غرابه كل مطلع عام و التتويج فاله

طبع جدانه يفكون البل بخشم السواري

وسمهم على العدا والا على امّات الشماله

وين ما حطّت رحايلهم لهم مجدٍ مباري

عنزيٍ غير للواجب ماهو مرخص حلاله

من حماها بالدم الاحمر حماها بالمصاري

من يحوف من وبرتها الصافيه عصبة عقاله

ساقها للمركز الاول ماهو بايع و شاري

مالكم غير النظر يا اهل التنافس و الدلاله

وضحكم راحت مع الندّر كبر بيض الحباري

اطلبوا من لجنة التنظيم حكام العداله

يفرشون لندر الويلان سجاد القفاري

لا ندبها ابو حمد شاشت لهوباله و باله

وجت مثل غيمٍ يحجب الشمس و يفج الغداري

لا احد يحسب المزن خيّل على الصيهد خياله

هذا ما غير عنزه مستاقةٍ سفن الصحاري

قالطين بصيتٍ يخيّم على الدنيا ظلاله

و هيبةٍ يامن بها المرتاع عن سحم الضواري

قبل نستغني عن السيف الحدب بابو محاله

و قبل لا يقطع فيافي نجد لوحات و كباري

ماضيٍ يعطيك عنه الحاضر الشامخ دلاله

والدول تكتب مفاخر مجدنا منهج وزاري

كل ما قيل عنزي لا تنطقون اسمه لحاله

بعدها قولو نعم و النعم فزنا به جباري

عندنا على النعم صك مثل صك الاعاله

محتمينه بالفعول اللي تقول جدار ناري

ماعليكم زود .. ننطقها تحفّاي و جماله

و الا يالولا الحيا لا قيل نعم اقول داري

لابةً تحكم خليج العرْب من جاله لجاله

كيف ما يطلع ولدهم للفخر و العز ضاري

من بني وايل بنيخيه و بني مشيب خواله

و الله انه من وشاح الكبريا ماهوب عاري