كلمات اغنية يالله يامنجي الصادق ومخزي الكذوب خالد ال بريك 2025

يا الله يا منجي الصادق ومخزي الكذوب

من لاذ بك يا إلهي ما يخيب تعبه

لولا الخطايا من الإنسان كيف بيتوب

سبحان من سبق برحمته قبل غضبه

إليا أسدل الليل والشمس انتحت للغروب

أطلّع الذكريات أسجّلها وأسحبه

من وين ما طلت القمرا وهب الهبوب

سجّيت رجلي وجبت من القصيد أعذّبه

يلّحني البارق اللي ساري من جنوب

وميض برقه يروّج ماه فوق حدبه

قضقض طوال الظهور وجات من كل صوب

على وميضه تتالت والسحاب حجبه

تقول عقدٍ على عنق الغزال اللعوب

ما هو بلايق لو تحطه بكل رقبه

ما يبلغ المجد من ضاقت عليه الدروب

نوّخ ركابه قبل لا ياصل لمطلبه

دورات الأفلاك معها سرت مع كل صوب

يركض خيالي تقول إنه على مركبه

أحد لو يغيّبه ظرف الزمان محسوب

وواحد لو إنه يتواجد ما حد يحسبه

وأنا لقيت الزمان أشهب ووجهه شحوب

وطرح لي الرمح حتى زان له مضربه

ضاعت كبار الهقاوي يوم جات الكروب

ومن المحازم طرالي محزم بكربه

صميدعٍ ما هو يدور مخارج هروب

يستاهل النعم والعصما من الموهبة

سيفٍ ما يصقل شباة إلا لخوض الحروب

النصر في سلته والعز في مقضبه

لسعيد وقفات مشهورة وناره شبوب

على سناها تشوف الذيب في مرقبه

واللي في كبده من الحرة سوات الثقوب

ياتيه زعلان ويعوّد يمس شنبه

هذا صبي شهران اللي ما هوب مغلوب

على شداد المناسب شامخٍ منسبه

جدانه اللي لا جاء الصايح بصوتٍ طنوب

جندالهم للشيوخ من الأصايل هبه

من راس عودٍ على كل اللوازم ينوب

للعود الأزرق مدار وللوجار لهبه

يا كثر ما مدّت اليمنى جداد الجيوب

ويسعى لفك الرقاب إلّا بغوه عربه

لا من تعزوى بناهس يلبس العز ثوب

تقول بينه ومن بين الرواسي شبه

مزيرقي يحرق الدنيا وصدره رحوب

ما همّه أليا صفا ولا كدر مشربه

خلّف ولا خلّف إلا كل شهم وطروب

كل أبلج يندبه طيبه قبل تندبه

أركون الأمجاد لا جا للدواعي وجوب

كلٍ يبي يجعل الحملة على منكبه

من عزوة فعلها شاهر ما هوب محجوب

من كبر تاريخها ما يحصر بمكتبه

يوم المراكيض في شبه الجزيرة تجوب

والحر ما يشبع إلا من طرف مخلبه

القوم لا ولعت نار الحرايب تذوب

شهران لا شبّت يشوفونها ملعبه