كلمات اغنية المترف الراوي روان 2025

يا تل قلبي لا شفت المبسم الضاوي

أنسى همومي .. أواخرها وأوايلها

ويا ويل حالي لا مال المترف الراوي

‏الحظ مايل .. وعدلته بمايلها

الغنْج غنْج الحضر .. واللعب بدّاوي

ما شافت العين من تعمل عمايلها

فـ الحسن تاهت على غربي وشرقاوي

وعلى الجنوبي وعلى نجدٍ وحايلها

‏أنا فدا الملوي المعقود واللاوي

‏ظفيرةٍ في محل الروح شايلها

الشال تحته غياهب ليل ظلماوي

تغار الأنوار من عتمة خصايلها

ومشبك شعرها تورّد غصنه الذاوي

‏من خصلةٍ ساقي الكوثر خمايلها

خلقة من الله تفوح بعود برماوي

والنجم ماهوب في علياه طايلها

‏كأنها يوم فلّت ليلها الطاوي

‏فكّـت لي القيد .. ما فكّـت جدايلها

‏أخذت فكرة عن الجنة وأنا غاوي

الحور تطري فـ بالي يوم أخايلها

‏وبعد جفاها كواني في الحشا كاوي

‏وفـ داخلي ثارت النار وهوايلها

مانيب فـ غيابها صابر ولا قاوي

يا عزتيلي .. وش الحيلة وأحايلها ؟

‏الزين واجد ولكن عرشها خاوي

‏كدايش الخيل .. ما تلحق أصايلها

‏أثر الحسن في بنات البدو ما ياوي

‏ لكن غطا سترها يخفي دلايلها

‏سيوف الاجداد حسب اللي روى الراوي

‏مدفونةٍ فـ المحاجر من سلايلها

يا كامل الزين.. هذا الزين وش ناوي

جعل الهماليل تسقيني مَخايلها

اشتقت والشوق ذيبٍ فـ الحشا عاوي

‏ليت القصايد تداوي شوق قايلها

‏وليت الغلا في قلوب الناس متساوي

‏كان البشر مستريحة مع مثايلها

يا مل قلبن يمر فـ ظرف مأساوي

حظوظه أخطت عليه .. وعال عايلها

‏بعض جروح الاوادم ماله مداوي

‏ولا كل حاجة غدت نلقى بدايلها