كلمات اغنية وارد اليابان سعود الحبابي 2025

راكب الي يطوي الدرب ويشوق النظر

يطرح الي في طريقه ويفهقهم وراه

وارد اليابان مهوب جمس ولا شفر

مركب الشيخان والي لهم وجهً وجاه

لونه ابيض مثل عمة كبير ف محَضَر

عارفً هرجه يخلّص وبيمينه عصاه

ماشريته غير جاني من حزام الظهر

صلب ابوي وتاج راسي مقاديم الدهاه

اصدرو له الاستمارة مقابيس الخطر

من قبل لاتِصدِر المحكمة صك البراه

بيض الله وجيههم عد همال المطر

وعد ماهبت هبوبه وما ذعذع هواه

متكل بالله تعالى وناويً ب السفر

لـ اذن المذن ووضيت واديت الصلاة

سارحً مع فجة النور و الوجهه حدر

بالمزاهب والهواجيس من شرق السراه

للرياض العاصمة حي والله ذي الدير

دار حكام الجزيرة مطوعة العصاه

ناحر قصر مشيدّ وراعيّه فخر ..

في فقارة نجد دون الفويلق والحصاه

مدهل شيوخ القبايل وعطرين السير

ولعبايد وقحطان وربوعه واخوياه

ذا وليد بن سويلم ويا نعم الذكر

حي والله ذي البنايد وحي الله نباه

دون ربعه يرخص المال في يسر وعسر

محزمً لعيال زيدان طال الله بقاه

نعرفه بالجود قبل المصمم والصور

ولا قد كلً يضيّف وفاتح له قناه

فدوته من يجمع المال من عاده غمر

ويوم شيّب و امتلى البنك سوى له سواه

ي سلامي يالنواميس والمجد العفر

وسيرة تذكر وتشكر على عز وغناه

ان مدحنا بالنثر وان مدحنا بالشعر

ماتوفيه المدايح ولانلحق جزاه

أشهد انه قد ملكني على طول العمر

بالجمايل والمعاريف من كل اتجاه

ولا انا قد قلت له بالمفيد المختصر

مثل ماقال ابن جدلان في راع الغضاه :

(ان نصيته في لزومي ملكني لاقدر

وان تعذر عن لزومي عسى الدنيا فداه)

والله اني ما نصيته لحاجه وانكسر

من عرفته يصرف الطيب من بنك الغناه

داري اني محزمه فـ الصعايب والقشر

عقب الي لا هرج له بهرج ما احتماه

من سلايل عزوة كناد فـ اليوم الغبر

لاطغى صوت العزاوي على ضرب الرماه

والسلام ورحمة الله على سيد البشر

الرسول الي هدانا عليه ازكى صلاه