كلمات اغنية غاية مرادي عبدالله الصخابرة 2025

الصدور أطرافها متراميه .. والليل هادي

‏لايروح الليل قبل أستنطقه وأخذ جديده

‏كل ماسقت القدم بين المبادي والمبادي

‏أعترض لي طاري الشوق وخذيت الشعر بيده

‏أرتجل للشرد من الصيد عن صهوه جوادي

‏وأعتق الي من سهوله صيدته كلاً يصيده

‏لاخذتني غايتي وابطيت ياغاية مرادي

‏والمسافة كايدة والحب باقي له شريده

‏أحتريني والبسي لي كل لون الا رمادي

‏الرمادي كل ماشوفه عرفت انه مكيده

‏ودّي أضحك من بعد طول المعاتب والتمادي

‏ضحكه الي يضحك من أدناة حاجه من حفيده

‏زمّليني من هواجيس الغياب الّا أرادي

‏إن ذبحني طاري الفرقا وش أنتي مستفيده

‏وأعبري بي لا غدي عادي و أنا مانيب عادي

‏الحريص تورده للموت .. غلطته الوحيده

‏ياعنيده مامعي صبراً مثل صبر المهادي

‏لا تعذرّتي مثل عذر المعقّد بالعقيده

‏في رجا الله مايخليني لـ جّدي وأجتهادي

‏مارجيت الا وعده ولا خشيت الا وعيده

‏لا أستوت فـ عيونك الثنتين قربي وأبتعادي

‏والظروف أقسى من الماضي على الي يستعيده

‏المصافح فالقلوب أصدق من مصافح الأيادي

‏أسمحي لي كل يوم أصافحك .. وأنتي بعيده

‏لا تحاتين الضمى والجوع في رحله جهادي

‏الحظوظ مقسّمه والذيب ماياكل وليده

‏شاعرك لا هامو أصحاب الشعر في كل وادي

‏مستعد يوقّف الدنياا على مطلع قصيده